ប៉េកាំង៖ បេសកជនចិន បានព្រមានប្រឆាំងនឹងហានិភ័យ នៃវិបត្តិអ៊ុយក្រែន ដែលឈានដល់មិនអាចគ្រប់គ្រងបាន។ចាប់តាំងពីការផ្ទុះឡើងរបស់ខ្លួន វិបត្តិអ៊ុយក្រែន បានបង្ហាញពីសញ្ញានៃការអូសបន្លាយ ការពង្រីក និងភាពស្មុគស្មាញជាមួយនឹងភាពឃោរឃៅ គ្រោះថ្នាក់ និងមិនអាចទាយទុកជាមុនបានកាន់តែច្រើនឡើងៗ
លោក Geng Shuang តំណាងអចិន្ត្រៃយ៍រងរបស់ចិន ប្រចាំអង្គការសហប្រជាជាតិ បានឲ្យដឹងថា សហគមន៍អន្តរជាតិ គួរតែធ្វើការរួមគ្នា ដើម្បីទប់ស្កាត់ស្ថានការណ៍ពីការគ្រប់គ្រង សម្រេចបាននូវការបញ្ឈប់អរិភាពនៅដំណាក់កាលដំបូង និងជំរុញដំណោះស្រាយនយោបាយ។
លោកបានប្រាប់ក្រុមប្រឹក្សាសន្តិសុខអង្គការសហប្រជាជាតិថា ការវិវត្ត នៃសមរភូមិបង្ហាញថា មធ្យោបាយយោធា មិនអាចដោះស្រាយវិបត្តិបាននោះទេ ហើយការអូសបន្លាយនៃជម្លោះ នឹងនាំមកនូវការឈឺចាប់កាន់តែច្រើនដល់ជនស៊ីវិល ហើយថែមទាំងអាចនាំទៅដល់ស្ថានភាព ដែលមិនអាចទាយទុកជាមុនបាន និងមិនអាចជួសជុលឡើងវិញបានទៀតផង មិនថាវិបត្តិមានរយៈពេលយូរប៉ុណ្ណាទេ វាត្រូវតែដោះស្រាយតាមមធ្យោបាយនយោបាយ។
ភាគីទាំងពីរនៃជម្លោះគួរតែជួបគ្នាពាក់កណ្តាលផ្លូវ ស្វែងរកដំណោះស្រាយ ដែលសម្រួលដល់កង្វល់របស់គ្នាទៅវិញទៅមក ដែលត្រូវគ្នាទៅនឹងភាពជាក់ស្តែងក្នុងតំបន់ ហើយដែលអាចជួយផ្សារភ្ជាប់ភាពខុសគ្នា។ លោកបានបន្ដថា សហគមន៍អន្តរជាតិ គួរតែធ្វើការរួមគ្នាដើម្បីបង្កើតលក្ខខណ្ឌចាំបាច់ សម្រាប់បទឈប់បាញ់ និងបង្កើតបរិយាកាសអំណោយផល សម្រាប់ការចរចាសន្តិភាព។
លោកបានបន្តថា វិបត្តិអ៊ុយក្រែន គឺជាការផ្ទុះឡើងដ៏ធំ នៃបញ្ហាសន្តិសុខនៅអឺរ៉ុប។ “វិបត្តិជាថ្មីម្តងទៀតបង្ហាញឱ្យឃើញថា ការស្វែងរកសន្តិសុខដាច់ខាត ការញុះញង់ឱ្យមានការប្រឈមមុខដាក់គ្នាក្នុងប្លុក និងការពង្រីកសម្ព័ន្ធភាពយោធា គឺជាវិធីគិតហួសសម័យ និងការអនុវត្តដ៏គ្រោះថ្នាក់ ដែលនឹងនាំមកនូវភាពចលាចល ដល់អឺរ៉ុប និងពិភពលោកទាំងមូល។
គន្លឹះនៃដំណោះស្រាយចុងក្រោយគឺ ដើម្បីរក្សាគោលគំនិត សន្តិសុខរួម ទូលំទូលាយ សហប្រតិបត្តិការ និងនិរន្តរភាព និងលើកកម្ពស់ស្ថាបត្យកម្មសន្តិសុខអឺរ៉ុប ប្រកបដោយតុល្យភាព ប្រសិទ្ធភាព និងនិរន្តរភាព។ លោក Geng បានសង្កត់ធ្ងន់លើសារៈសំខាន់នៃការគ្រប់គ្រងឥទ្ធិពលលេចធ្លាយនៃវិបត្តិនេះ។
ការងើបឡើងវិញ នៃសេដ្ឋកិច្ចពិភពលោក បន្ទាប់ពីជំងឺរាតត្បាតមានការលំបាក។ វិបត្តិអ៊ុយក្រែន លើសពីកត្តាផ្សេងទៀត បានជះឥទ្ធិពលយ៉ាងធ្ងន់ធ្ងរដល់ការអភិវឌ្ឍន៍ពិភពលោក ដោយនាំមកនូវភាពផុយស្រួយដល់អាហារ ថាមពល និងសន្តិសុខហិរញ្ញវត្ថុសកល។ លោកថា ជាលទ្ធផលប្រទេស កំពុងអភិវឌ្ឍន៍ប្រឈមនឹងការលំបាកកាន់តែច្រើនក្នុងការសម្រេចបាន នូវគោលដៅអភិវឌ្ឍន៍ប្រកបដោយចីរភាព។
សហគមន៍អន្តរជាតិគួរតែលះបង់ធនធានហិរញ្ញវត្ថុរបស់ខ្លួនដើម្បីដោះស្រាយបញ្ហាប្រឈមសកលទូទៅ។ លោកបានបន្ថែមថា ប្រទេសមួយចំនួនគួរតែបញ្ឈប់ជាបន្ទាន់នូវការដាក់ទណ្ឌកម្មឯកតោភាគី និងយុត្តាធិការអាវុធវែង ធានានូវខ្សែសង្វាក់ឧស្សាហកម្ម និងខ្សែសង្វាក់ផ្គត់ផ្គង់សកលប្រកបដោយសុវត្ថិភាព និងរលូន បង្កើនការគាំទ្រ និងជំនួយដល់ប្រទេសកំពុងអភិវឌ្ឍន៍ និងធ្វើអ្វីៗជាច្រើនទៀត ដែលអំណោយផលដល់កំណើនសេដ្ឋកិច្ច។
មនុស្សរាប់លាននាក់ត្រូវបានផ្លាស់ទីលំនៅដោយសារជម្លោះអូសបន្លាយ ហើយហេដ្ឋារចនាសម្ព័ន្ធសំខាន់ៗត្រូវបានបំផ្លាញ។ ភាគីនៃជម្លោះគួរតែគោរពយ៉ាងតឹងរឹងទៅនឹងច្បាប់មនុស្សធម៌អន្តរជាតិ។ អនុវត្តយ៉ាងតឹងរឹង នូវគោលការណ៍ នៃភាពចាំបាច់ ភាពខុសគ្នា និងសមាមាត្រការពារជនស៊ីវិល និងហេដ្ឋារចនាសម្ព័ន្ធស៊ីវិល ផ្តល់លទ្ធភាពទទួលបានមនុស្សធម៌យ៉ាងឆាប់រហ័ស សុវត្ថិភាព និងគ្មានការរារាំង ដើម្បីកាត់បន្ថយការឈឺចាប់របស់ជនស៊ីវិល។
លោកបានបញ្ជាក់ថា ប្រទេសចិន លើកទឹកចិត្តសហគមន៍អន្តរជាតិ និងទីភ្នាក់ងារមនុស្សធម៌ ដោយឈរលើមូលដ្ឋាននៃការគោរពតាមគោលការណ៍ នៃការផ្តល់ជំនួយមនុស្សធម៌ ដើម្បីបង្កើនជំនួយមនុស្សធម៌ដល់ប្រជាជន ដែលរងផលប៉ះពាល់ដោយវិបត្តិ។
ការផ្ទេរគ្រាប់បែកចង្កោមដោយមិនទទួលខុសត្រូវអាចបង្កបញ្ហាមនុស្សធម៌បានយ៉ាងងាយ។ ក្តីកង្វល់ផ្នែកមនុស្សធម៌ និងតម្រូវការសន្តិសុខយោធាស្របច្បាប់ គួរតែត្រូវបានដោះស្រាយប្រកបដោយតុល្យភាព។ លោកបញ្ជាក់ច្បាស់ថា ការប្រុងប្រយ័ត្ន និងការអត់ធ្មត់គួរតែត្រូវបានអនុវត្តនៅក្នុងការផ្ទេរគ្រាប់បែកចង្កោម៕ ប្រែសម្រួល ឈូក បូរ៉ា
