តូក្យូ៖ កូរ៉េខាងត្បូង និងជប៉ុន បានឲ្យដឹងថា កូរ៉េខាងជើង បានបាញ់មីស៊ីលរយៈចម្ងាយខ្លីពីរគ្រាប់ ចូលសមុទ្រនៅឆ្នេរភាគខាងកើតរបស់ខ្លួន កាលពីល្ងាចថ្ងៃចន្ទ ខណៈភាពតានតឹងនៅតែមានខ្ពស់ ជុំវិញការធ្វើតេស្តអាវុធជាញឹកញាប់ របស់ក្រុងព្យុងយ៉ាង។
ក្រសួងការពារជាតិជប៉ុន បានឲ្យដឹងថា កាំជ្រួចទីមួយបានហោះបានចម្ងាយប្រហែល ៣៥០គីឡូម៉ែត្រ និងទីពីរប្រហែល ៤០០គីឡូម៉ែត្រ ដោយបន្ថែមថា មីស៊ីលទាំងពីរទំនងជា បានធ្លាក់នៅខាងក្រៅតំបន់សេដ្ឋកិច្ច ផ្តាច់មុខរបស់ប្រទេស ដែលលាតសន្ធឹងប្រហែល ៣៧០ គីឡូម៉ែត្រពីឆ្នេរសមុទ្ររបស់ខ្លួន។
អគ្គសេនាធិការចម្រុះរបស់ យោធាកូរ៉េខាងត្បូងបានឲ្យដឹងថា កាំជ្រួចត្រូវបានបាញ់ចេញពីក្បែរ ទីក្រុងព្យុងយ៉ាងនៅចន្លោះម៉ោង ១១ និង៥៥នាទីយប់ និងពាក់កណ្តាលអធ្រាត្រ។ ក្រសួងជប៉ុន បានឲ្យដឹងផងដែរថា មីស៊ីលទាំងពីរគ្រាប់ បានហោះឡើងដល់កម្ពស់ប្រហែល ១០០ គីឡូម៉ែត្រ។
ការបាញ់បង្ហោះចុងក្រោយនេះ បានកើតឡើងបន្ទាប់ពីនាវាមុជទឹករបស់អាមេរិក Annapolis បានធ្វើការហៅកំពង់ផែនៅកោះជេជូ ភាគខាងត្បូងប្រទេសកូរ៉េខាងត្បូង កាលពីថ្ងៃចន្ទ ដែលជាផ្នែកនៃកិច្ចខិតខំប្រឹងប្រែង ជាក់ស្តែងរបស់ទីក្រុងវ៉ាស៊ីនតោន និងទីក្រុងសេអ៊ូល ដើម្បីពង្រឹងការរារាំងនៅក្នុងតំបន់។
នៅមុនខួបលើកទី៧០ នៃការចុះហត្ថលេខាថ្ងៃទី២៧ ខែកក្កដា នៃបទឈប់បាញ់ សម្រាប់សង្គ្រាមកូរ៉េឆ្នាំ១៩៥០-១៩៥៣ កូរ៉េខាងជើង បានបាញ់មីស៊ីលជាច្រើន គ្រាប់ឆ្ពោះទៅសមុទ្រលឿង កាលពីថ្ងៃសៅរ៍ និងដោយផ្គើននឹងសេចក្តីសម្រេច របស់ក្រុមប្រឹក្សាសន្តិសុខអង្គការសហប្រជាជាតិ មីស៊ីលផ្លោងរយៈចម្ងាយខ្លី ពីរគ្រាប់ឆ្ពោះទៅសមុទ្រជប៉ុន កាលពីថ្ងៃពុធសប្ដាហ៍មុន។
នៅទីក្រុងវ៉ាស៊ីនតោន អ្នកនាំពាក្យសេតវិមានលោកស្រី Karine Jean-Pierre បានថ្កោលទោសការបាញ់បង្ហោះនេះថា បានរំលោភលើដំណោះស្រាយ របស់អង្គការសហប្រជាជាតិ និងបង្កការគំរាមកំហែង ដល់សហគមន៍អន្តរជាតិ។
លោកស្រី បានឲ្យដឹងក្នុងអំឡុង សន្និសីទសារព័ត៌មានមួយថា “ការប្តេជ្ញាចិត្តរបស់យើង ចំពោះការការពារប្រទេសកូរ៉េខាងត្បូង និងជប៉ុន នៅតែរក្សាបាននូវភាពកក់ក្តៅ” ខណៈពេលដែលជំរុញឱ្យកូរ៉េខាងជើង ចូលរួមក្នុងកិច្ចសន្ទនា ៕
ប្រែសម្រួល ឈូក បូរ៉ា
