បរទេស៖ មេអង្គរក្សរបស់ប្រធានាធិបតីប្រទេសនីហ្សេ លោកឧត្តមសេនីយ៍ Abdourahamane Tiani ដែលជាអ្នកដឹកនាំការធ្វើរដ្ឋប្រហារទម្លាក់លោកប្រធានាធិបតី Mohamed Bazoum ក្នុងសប្តាហ៍នេះ បានប្រកាសខ្លួនឯងជាមេដឹកនាំជាតិថ្មី។
យោងតាមសារព័ត៌មាន RT ចេញផ្សាយកាលពីថ្ងៃទី២៨ ខែកក្កដា ឆ្នាំ២០២៣ បានឱ្យដឹងថា លោក Abdourahamane ដែលត្រូវបានគេស្គាល់ថា Omar Tchiani បានបង្ហាញខ្លួននៅលើប៉ុស្តិ៍ទូរទស្សន៍រដ្ឋ Tele Sahel កាលពីថ្ងៃសុក្រ ដោយហៅខ្លួនឯងថាជាប្រធានក្រុមប្រឹក្សាយោធាដែលទើបបង្កើតថ្មី ក្រុមប្រឹក្សាជាតិសម្រាប់ការពារមាតុភូមិ ហើយអះអាងថា រដ្ឋប្រហារកាលពីថ្ងៃពុធគឺដើម្បីការពារសន្តិសុខជាតិ។
ប្រធានាធិបតីគឺលោក Bazoum ត្រូវបានឃុំខ្លួនកាលពីព្រឹកថ្ងៃពុធ ដោយសមាជិកសន្តិសុខលម្អិតរបស់គាត់ ហើយមន្ត្រីយោធាកំពូលៗ ក្រោយមកបានប្រកាសថា គាត់ត្រូវបានដកចេញពីអំណាច ហើយស្ថាប័នរដ្ឋទាំងអស់ត្រូវបានព្យួរ។
ប្រទេសនីហ្សេ ត្រូវបានគេចាត់ទុកថាជាសម្ព័ន្ធមិត្តរបស់លោកខាងលិចក្នុងការដោះស្រាយការបះបោររបស់ក្រុមជីហាដនៅក្នុងតំបន់ Sahel ដោយមានទាហានពីប្រទេសបារាំង និងសហរដ្ឋអាមេរិកមានមូលដ្ឋាននៅទីនោះ។
ភាពចលាចលនេះ បានបង្កឱ្យមានការថ្កោលទោស ជាអន្តរជាតិ ដោយប្រធានាធិបតីបារាំង Emmanuel Macron បានចូលរួមជាមួយប្លុក តំបន់អាហ្វ្រិកខាងលិច (ECOWAS) ក្នុងការទាមទារឱ្យមេដឹកនាំ រដ្ឋប្រហារដោះលែង លោក Bazoum ។
លោក Macron បានពណ៌នាលោក Bazoum ថាជា “មេដឹកនាំដ៏ក្លាហាន ដែលកំពុងធ្វើកំណែទម្រង់ និងការវិនិយោគ ដែលប្រទេសរបស់លោកត្រូវការ” ដោយបន្ថែមថា ទីក្រុងប៉ារីស នឹងគាំទ្រដល់មហាអំណាចក្នុងតំបន់ ក្នុងការដាក់ទណ្ឌកម្មលើអ្នកគ្រោងធ្វើរដ្ឋប្រហារ៕
ប្រែសម្រួលៈ ណៃ តុលា
