ប៉េកាំង ៖ អ្នកនាំពាក្យការពារជាតិ បានឲ្យដឹងថា យោធាចិនតែងតែជាកម្លាំងដ៏រឹងមាំមួយ ក្នុងការរក្សាសន្តិភាព និងស្ថិរភាពពិភពលោក នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
លោក Tan Kefei អ្នកនាំពាក្យក្រសួងការពារជាតិចិន បានឲ្យដឹងនៅក្នុងការឆ្លើយតប ទៅនឹងសំណួរទាក់ទងនឹងក្រដាស ការពារជាតិឆ្នាំ២០២៣ ដែលអនុម័តដោយរដ្ឋាភិបាលជប៉ុនថា កម្លាំងយោធារបស់ប្រទេសចិន មិនដែលបង្កបញ្ហាដល់នរណាម្នាក់ ឬគំរាមកំហែង ដល់អ្នកដទៃនោះទេ។
យោងតាមរបាយការណ៍ របស់ប្រព័ន្ធផ្សព្វផ្សាយ ក្រដាសសនិយាយថា ប្រទេសចិន បានបង្ហាញពីបញ្ហាប្រឈមជាយុទ្ធសាស្ត្រ ដែលមិនធ្លាប់មានពីមុនមក និងធំបំផុត ចំពោះប្រទេសជប៉ុន។
លោកបានលើកឡើងថា ក្រដាសសការពារជាតិរបស់ជប៉ុន ប្រកាន់ខ្ជាប់ទៅនឹងការ យល់ឃើញខុសរបស់ខ្លួន ចំពោះប្រទេសចិន ដោយចេតនាបំផ្លើស នូវអ្វីដែលគេហៅថា “ការគំរាមកំហែងយោធាចិន” ធ្វើឱ្យប៉ះពាល់ដល់ការអភិវឌ្ឍន៍ និងសកម្មភាពយោធាស្របច្បាប់របស់ចិន ជ្រៀតជ្រែកចូលកិច្ចការផ្ទៃក្នុងរបស់ចិន និងបង្កភាពតានតឹងក្នុងតំបន់ ។
អ្នកនាំពាក្យរូបនេះបានកត់សម្គាល់ថា “យើងប្រឆាំងយ៉ាងខ្លាំងចំពោះរឿងនេះ ហើយបានធ្វើការតំណាងយ៉ាងធ្ងន់ធ្ងរ ដល់ប្រទេសជប៉ុនរួចហើយ”។លោកបន្ដថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសជប៉ុន បានបង្កើនការចំណាយលើវិស័យ ការពារជាតិយ៉ាងច្រើន ហើយបាននិងកំពុងជំរុញការពង្រីកយោធារបស់ខ្លួនជាបន្តបន្ទាប់ ដោយបន្ថែមថា ខ្លួនបានតម្រឹមខ្លួនឯងជាមួយ នឹងមហាអំណាចមួយចំនួន។
លោកបានបន្ថែមថា ទង្វើទាំងនេះបានបង្កបញ្ហាប្រឈមយ៉ាងធ្ងន់ធ្ងរ ដល់សន្តិភាព សន្តិសុខ និងស្ថិរភាពក្នុងតំបន់ និងពិភពលោក។ អ្នកនាំពាក្យរូបនេះបានជំរុញឱ្យប្រទេសជប៉ុន រៀនពីមេរៀនប្រវត្តិសាស្ត្រ ចៀសវាងពាក្យសម្ដី និងសកម្មភាពមិនទទួលខុសត្រូវ បោះបង់ការគិតទល់មុខគ្នា និងប្រឈមមុខដាក់គ្នាចំពោះប្រទេសជិតខាង បង្កើតការយល់ ដឹងត្រឹមត្រូវអំពីប្រទេសចិន និងចាត់វិធានការជាក់ស្តែង ដើម្បីស្ដារទំនាក់ទំនងទ្វេភាគី ឱ្យដើរលើផ្លូវត្រូវឡើងវិញ ៕
ប្រែសម្រួល ឈូក បូរ៉ា
