ស្ដុកហូម៖ ក្រសួងការពារជាតិស៊ុយអែត បានឲ្យដឹងថា ការចូលជាសមាជិករបស់ប្រទេសស៊ុយអែត ទៅក្នុងអង្គការណាតូ នឹងមានឥទ្ធិពលដោយស្វ័យប្រវត្តិនូវការចូលរួមរបស់ខ្លួននៅក្នុងមូលនិធិច្នៃប្រឌិតណាតូ (NIF) ដែលជាមូលនិធិបណ្តាក់ទុនពហុអធិបតេយ្យចំនួន ១ ពាន់លានអឺរ៉ូ (១,១ពាន់លានដុល្លារ) សម្រាប់ការវិនិយោគក្នុងការចាប់ផ្តើមវិស័យការពារជាតិ។
មូលនិធិច្នៃប្រឌិតណាតូ NIF ត្រូវបានរចនាឡើង ដើម្បីវិនិយោគលើការចាប់ផ្តើមផ្នែកការពារជាតិ និងសន្តិសុខនៅក្នុងរដ្ឋដៃគូរបស់ខ្លួន ដែលបច្ចុប្បន្នរួមបញ្ចូលប្រទេសចំនួន ២៣ ក្នុងចំណោម ៣១ ប្រទេសរបស់អង្គការណាតូ។
ក្រសួងបានបញ្ជាក់ថា “ការចូលរួមរបស់ប្រទេសស៊ុយអែត នៅក្នុងមូលនិធិច្នៃប្រឌិតណាតូ នឹងចូលជាធរមាននៅពេលចូលជាសមាជិកសន្ធិសញ្ញាអាត្លង់ទិកខាងជើង។ ការរួមចំណែករបស់ស៊ុយអែត នឹងបន្ថែមទៅក្នុងមូលនិធិបណ្តាក់ទុនបច្ចុប្បន្នចំនួន ១ ពាន់លានអឺរ៉ូ ជំរុញទុនវិនិយោគនៃមូលនិធិច្នៃប្រឌិតណាតូ និងពង្រឹងសមត្ថភាពច្នៃប្រឌិតនៅទូទាំងសម្ព័ន្ធ”។
គួរបញ្ជាក់ថា ប្រទេសដែលចូលរួមរបស់ NIF រួមមាន បែលហ្ស៊ិក ប៊ុលហ្គារី សាធារណរដ្ឋឆេក ដាណឺម៉ាក អេស្តូនី ហ្វាំងឡង់ អាល្លឺម៉ង់ ក្រិក ហុងគ្រី អ៊ីស្លង់ អ៊ីតាលី ឡាតវី លីទុយអានី លុចសំបួ ហូឡង់ ន័រវេស ប៉ូឡូញ ព័រទុយហ្គាល់ រូម៉ានី ស្លូវ៉ាគី អេស្ប៉ាញ តួកគី និងចក្រភពអង់គ្លេស។
ប្រទេសស៊ុយអែត រួមជាមួយនឹងហ្វាំងឡង់ បានដាក់ពាក្យស្នើសុំអង្គការណាតូរបស់ខ្លួននៅក្នុងខែឧសភា ឆ្នាំ២០២២ ប៉ុន្មានខែបន្ទាប់ពីប្រទេសរុស្ស៊ី បានចាប់ផ្តើមប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន។
ហ្វាំងឡង់ បានក្លាយជាសមាជិកនៃសម្ព័ន្ធភាពនៅខែមេសា ឆ្នាំ២០២៣ ខណៈពាក្យស្នើសុំរបស់ស៊ុយអែត នៅតែរង់ចាំការផ្តល់សច្ចាប័ន ដោយហុងគ្រី និងតួកគី នៅឡើយ៕ ប្រែសម្រួល ឈូក បូរ៉ា
