គណបក្សភឿថៃ ប្រកាសបេក្ខជន ដឹកនាំនៅក្រសួងធំៗ ចំនួន៥ ពេលបង្កើតរដ្ឋាភិបាលថ្មីរួច, កូនស្រីលោកថាក់ស៊ីន ដឹកនាំក្រសួងការបរទេស

បរទេស ៖ បន្ទាប់ពីការប្រកាស របស់ខ្លួនកាលពីថ្ងៃពុធថា គណបក្សភឿថៃ កំពុងត្រៀមខ្លួនដើម្បីបង្កើត រដ្ឋាភិបាលដោយគ្មាន គណបក្សចលនាឆ្ពោះទៅមុខ ឬ Move Forward ហើយនោះ គណបក្សភឿថៃ បានដាក់ផែនការ របស់ខ្លួនដើម្បីបង្កើតគណៈរដ្ឋមន្ត្រីថ្មី ជាមួយនឹងបេក្ខជន របស់ខ្លួន ដែលដឹកនាំក្រសួងធំៗចំនួនប្រាំ ។ នេះបើតាមប្រភពព័ត៌មាន ដែលដឹងពីបញ្ហានេះប្រាប់កាសែត The Nation។

យោងតាមសារព័ត៌មាន The Nation ចេញផ្សាយនៅថ្ងៃទី៣ ខែសីហា ឆ្នាំ២០២៣ បានឱ្យដឹងថា តាមគម្រោង បេក្ខភាពនាយករដ្ឋមន្ត្រី របស់គណបក្សភឿថៃ និងជាអតីតមហាសេដ្ឋី អចលនទ្រព្យ លោកស្រែតថា ថាវីស៊ីន នឹងក្លាយជានាយករដ្ឋមន្ត្រីទី ៣០ របស់ប្រទេសថៃ។

តាមគម្រោងផែនការនោះ គឺមេដឹកនាំគណបក្សភឿថៃ លោក Chonlanan Srikaew នឹងដឹកនាំក្រសួងមហាផ្ទៃ ខណៈដែលបេក្ខជន នាយករដ្ឋមន្ត្រីម្នាក់ទៀត របស់គណបក្ស ដែលជាកូនស្រីរបស់លោក ថាក់ស៊ីន គឺលោកស្រី ផែតងតាន ស៊ីណាវ៉ាត្រា នឹងក្លាយជារដ្ឋមន្ត្រី ក្រសួងការបរទេស ។

តំណែងជារដ្ឋមន្ត្រីក្រសួងដឹកជញ្ជូន និងថាមពល នឹងត្រូវធ្លាក់ទៅលើអគ្គលេខាធិការបក្ស លោក Prasert Jantararuangtong ៕

ប្រែសម្រួលៈ ណៃ តុលា