បរទេស ៖ មេដឹកនាំម្នាក់ នៃរដ្ឋប្រហារ កាលពីសប្តាហ៍មុន នៅក្នុងប្រទេសនីហ្សេរីយ៉ា តាមសេចក្តីរាយការណ៍ បានស្វែងរកជំនួយ ពីក្រុមហ៊ុន ទាហានរុស្ស៊ី Wagner Group PMC ខណៈដែលរបបយោធា ជិតដល់ថ្ងៃកំណត់ ដើម្បីប្រគល់ប្រធានាធិបតី ដែលត្រូវបានបណ្តេញ ចេញពីអំណាច របស់ប្រទេសនេះឱ្យឡើង កាន់អំណាច ឬប្រឈមមុខនឹងអន្តរាគមន៍យោធា ដែលអាចធ្វើទៅបាន ដោយប្រទេសជិតខាង។
យោងតាមសារព័ត៌មាន RT ចេញផ្សាយនៅថ្ងៃទី៥ ខែសីហា ឆ្នាំ២០២៣ បានឱ្យដឹងដោយផ្អែកតាមការផ្សាយ របស់សារព័ត៌មាន Associated Press បានរាយការណ៍ កាលពីថ្ងៃសៅរ៍ ដោយដកស្រង់សម្តីអ្នកកាសែតបារាំង Wassim Nasr ដែលជាអ្នកស្រាវជ្រាវជាន់ខ្ពស់ នៅមជ្ឈមណ្ឌល Soufan ថា ឧត្តមសេនីយ Salifou Moody ត្រូវបានគេអះអាងថា បានធ្វើសំណើបែបនេះក្នុងអំឡុងពេលដំណើរទស្សនកិច្ច ទៅកាន់ប្រទេសជិតខាងប្រទេសម៉ាលី ជាកន្លែងដែលលោកបានជួប ជាមួយអ្នកតំណាងទាហាន Wagner ។
កិច្ចប្រជុំនេះត្រូវបានរាយការណ៍ ជាលើកដំបូងដោយ France 24 ហើយលោក Nasr បាននិយាយថា លោកបានបញ្ជាក់ពីការពិភាក្សា ជាមួយអ្នកការទូតបារាំងម្នាក់ និងមនុស្សបីនាក់ដែលដឹងពីបញ្ហានេះ នៅក្នុងប្រទេសម៉ាលី។
លោក Nasr បានប្រាប់ AP ដោយអះអាងថា ក្រុមទាហាន Wagner កំពុងពិចារណាលើសំណើនេះថា “ពួកគេត្រូវការ (Wagner) ពីព្រោះពួកគេនឹងក្លាយជាការធានា របស់ពួកគេក្នុងការកាន់អំណាច” ។
ទាំង Wagner និងមន្ត្រីរដ្ឋាភិបាលរុស្ស៊ី មិនបានធ្វើអត្ថាធិប្បាយ លើសំណើសុំជំនួយពីក្រុមហ៊ុនទាហានស៊ីឈ្នួល Wagner ដែលត្រូវបានចោទប្រកាន់ របស់របបយោធានោះទេ ។ វិមានក្រឹមឡាំងបាននិយាយ កាលពីថ្ងៃសុក្រថា ការជ្រៀតជ្រែកណាមួយនៅក្នុងប្រទេសនីហ្សេ ពីមហាអំណាច នៅខាងក្រៅតំបន់ គឺទំនងជាមិនធ្វើឱ្យស្ថានភាព ប្រសើរឡើងនោះទេ។ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានថា “យើងបន្តអនុគ្រោះដល់ការវិលត្រលប់ទៅរកភាពប្រក្រតី នៃរដ្ឋធម្មនុញ្ញយ៉ាងឆាប់រហ័ស ដោយមិនបង្កគ្រោះថ្នាក់ដល់អាយុជីវិតមនុស្ស” ។
ចំណែកប្រធានក្រុមហ៊ុនទាហាន ស៊ីឈ្នួល Wagner លោក Yevgeny Prigozhin បានហៅរដ្ឋប្រហារថាជា “ការបះបោរដោយសមហេតុផល របស់ប្រជាជនប្រឆាំងនឹងការកេង ប្រវ័ញ្ចរបស់លោកខាងលិច” ៕
ប្រែសម្រួលៈ ណៃ តុលា
