ប៉េកាំង៖ អ្នកនាំពាក្យក្រសួងការបរទេសចិនបានឲ្យដឹងថា ខ្លួនសង្ឃឹមថា ប្រទេសជប៉ុន នឹងធ្វើការជាមួយប្រទេសចិន ដើម្បីយកខួបលើកទី៤៥ នៃសន្ធិសញ្ញាសន្តិភាព និងមិត្តភាពរវាងចិន និងជប៉ុន ជាឱកាសមួយ ដើម្បីពិនិត្យមើលឡើងវិញនូវស្មារតីនៃសន្ធិសញ្ញា ហើយប្តេជ្ញាចិត្តឡើងវិញចំពោះមតិឯកច្ឆន្ទនៅក្នុងសន្ធិសញ្ញា និងរួមគ្នាកសាងទំនាក់ទំនងចិន-ជប៉ុន ដែលអាចបំពេញតម្រូវការនៃយុគសម័យថ្មី។
អ្នកនាំពាក្យរូបនេះបានឲ្យដឹងនៅពេលឆ្លើយសំណួរពាក់ព័ន្ធថា “កាលពី ៤៥ឆ្នាំមុន ចិន និងជប៉ុន បានបញ្ចប់សន្ធិសញ្ញាសន្តិភាព និងមិត្តភាពរវាងចិន និងជប៉ុន” បង្កើតគោលការណ៍ និងទិសដៅយូរអង្វែង សម្រាប់អន្តរកម្មទ្វេភាគី ដែលបង្ហាញថាមានភាពពាក់ព័ន្ធដូចពីមុន។
អ្នកនាំពាក្យរូបនេះបានបន្ថែមថា ក្នុងរយៈពេល ៤៥ឆ្នាំកន្លងមកនេះ ទំនាក់ទំនងចិន-ជប៉ុន បានរីកចម្រើនយ៉ាងខ្លាំង ដោយនាំមកនូវផលប្រយោជន៍ជាក់ស្តែងដល់ប្រជាជនទាំងពីរ និងរួមចំណែកដល់ភាពរុងរឿង និងស្ថិរភាពនៃតំបន់ និងលើសពីនេះទៅទៀត។
អ្នកនាំពាក្យរូបនេះបានលើកឡើងថា “ទំនាក់ទំនងរវាងប្រទេសយើងទាំងពីរស្ថិតក្នុងដំណាក់កាលសំខាន់នៃការកែលម្អ និងការរីកចម្រើន” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
គេសង្ឃឹមថាជប៉ុន នឹងធ្វើការជាមួយចិន ដើម្បីយកខួបលើកទី៤៥ នៃសន្ធិសញ្ញាជាឱកាស ដើម្បីពិនិត្យមើលឡើងវិញ នូវស្មារតី នៃសន្ធិសញ្ញា ប្តេជ្ញាចិត្តឡើងវិញ ចំពោះការឯកភាពក្នុងសន្ធិសញ្ញា លើកកំពស់មូលដ្ឋានគ្រឹះនយោបាយ បង្កើនកិច្ចសហប្រតិបត្តិការ ដែលមានផលប្រយោជន៍ទៅវិញទៅមក បំបាត់ការរំខាន និងឧបសគ្គ ដោយបានបន្ថែមថា និងរួមគ្នាកសាងទំនាក់ទំនងចិន-ជប៉ុន ដែលអាចបំពេញតម្រូវការនៃយុគសម័យថ្មី៕ ប្រែសម្រួល ឈូក បូរ៉ា
