សេអ៊ូល ៖ ក្រុមសកម្មជន សន្តិភាពកូរ៉េខាងត្បូងមួយក្រុម បានជំរុញឱ្យបញ្ឈប់សមយុទ្ធយោធា រួមរបស់ប្រទេស ជាមួយសហរដ្ឋអាមេរិក ដែលគ្រោងនឹងធ្វើឡើង នៅចុងខែសីហា នេះបើយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ ។
តាមការលើកឡើងរបស់ការជួបជុំសន្តិភាបនាឲ្យដឹងថា “ឧបទ្វីបកូរ៉េឥឡូវនេះ គឺជាផ្លូវបំបែកនៃសង្រ្គាម និងសន្តិភាពម្តងទៀត។ ការបញ្ឈប់សមយុទ្ធយោធារួមគ្នារវាងកូរ៉េខាងត្បូង និងសហរដ្ឋអាមេរិក អាចជាជំហានសម្រេចចិត្តមួយ ក្នុងការទប់ស្កាត់សង្រ្គាម និងការបើកទ្វារ សម្រាប់ការសន្ទនាម្តងទៀត” ។
សកម្មជនបានស្រែកទាមទារសន្តិភាព ក្នុងអំឡុងពេលបាតុកម្មដែលបានធ្វើឡើង នៅមុខការិយាល័យប្រធានាធិបតីក្នុងទីក្រុងសេអ៊ូល ដែលក្រសួងការពារជាតិមានទីស្នាក់ការផងដែរ ។
បណ្តឹងឧទ្ធរណ៍សន្តិភាពកូរ៉េ ដែលមានសមាសភាពពីក្រុមពលរដ្ឋ និងសាសនារាប់រយនាក់ នៅក្នុងប្រទេសកូរ៉េខាងត្បូង ក៏ដូចជាមនុស្សរាប់សិបនាក់ នៅក្រៅប្រទេសបានឲ្យដឹងថា “ការបង្ហាញកម្លាំងដ៏គ្រោះថ្នាក់បំផុតនេះ ដែលបង្កើនលទ្ធភាព សម្រាប់ជម្លោះយោធា នឹងបញ្ចប់ដោយគ្រោះមហន្តរាយ” ។
អ្នករៀបចំកម្មវិធីបានអំពាវនាវឱ្យរដ្ឋាភិបាលកូរ៉េខាងត្បូង និងសហរដ្ឋអាមេរិក បន្ធូរបន្ថយភាពតានតឹងផ្នែកយោធា និងខិតខំប្រឹងប្រែងអស់ពីសមត្ថភាព ដើម្បីការពារជម្លោះប្រដាប់អាវុធនៅឧបទ្វីបកូរ៉េ។
គួរបញ្ជាក់ថា សមយុទ្ធ Ulchi Freedom Shield (UFS) រវាងសម្ព័ន្ធមិត្តទាំងពីរ ដែលជាសមយុទ្ធយោធា រួមរដូវក្តៅ ដែលពាក់ព័ន្ធនឹងសមយុទ្ធ ក្នុងទ្រង់ទ្រាយធំ ត្រូវបានគេគ្រោងនឹងធ្វើឡើង ចាប់ពីថ្ងៃទី២១ ដល់ថ្ងៃទី៣១ ខែសីហា នេះបើយោងតាមអគ្គសេនាធិការចម្រុះរបស់កូរ៉េខាងត្បូង (JCS)៕
ប្រែសម្រួល ឈូក បូរ៉ា
