គៀវ៖ អភិបាលតំបន់បានឲ្យដឹងថា យន្តហោះដ្រូនអ៊ុយក្រែនមួយគ្រឿង បានហោះបុកដំបូលអគារ ស្ថានីយរថភ្លើងក្នុងទីក្រុង Kursk ភាគខាងត្បូងប្រទេសរុស្ស៊ី កាលពីព្រឹកថ្ងៃអាទិត្យ ដោយបានបង្កឲ្យមានភ្លើងឆេះ និងបង្កឲ្យមានមនុស្ស ៥ នាក់រងរបួស ។
លោក Roman Starovoit បានឲ្យដឹងនៅលើបណ្តាញ ផ្សព្វផ្សាយសង្គមរបស់លោកថា មនុស្ស ៥នាក់បានរងរបួសស្រាលដោយសារការបាក់កញ្ចក់ ដោយបន្ថែមថា សេវាសង្គ្រោះបន្ទាន់ទាំងអស់ កំពុងធ្វើការនៅកន្លែងកើតហេតុ។
ទីភ្នាក់ងារសារព័ត៌មាន Ukrinform គ្រប់គ្រងដោយរដ្ឋាភិបាលបានរាយការណ៍ថា ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានឲ្យដឹងថា អ្នកបើកយន្តហោះអ៊ុយក្រែន បានចាប់ផ្តើមសាកល្បងហោះហើរយន្តហោះចម្បាំង Gripen របស់ប្រទេសស៊ុយអែត។
លោក ហ្សេឡិនស្គី បានឲ្យដឹង នៅក្នុងសន្និសីទសារព័ត៌មាន រួមគ្នាជាមួយនាយករដ្ឋមន្រ្តីស៊ុយអែត Ulf Kristersson បន្ទាប់ពីកិច្ចប្រជុំរបស់ពួកគេ នៅប្រទេសស៊ុយអែតថា ភាគីអ៊ុយក្រែនចាប់អារម្មណ៍ក្នុងការទទួលបានយន្តហោះ Gripen ដើម្បីពង្រឹងជំហររបស់ខ្លួនក្នុងជម្លោះជាមួយរុស្ស៊ី។
របាយការណ៍បានឲ្យដឹងថា នៅក្នុងកិច្ចពិភាក្សា របស់ពួកគេ លោក ហ្សេឡីនស្គី និងលោក Kristersson ក៏បានពិភាក្សាអំពីលទ្ធភាព នៃការផលិតរួមគ្នា នៃរថយន្តប្រយុទ្ធថ្មើរជើងស៊ុយអែត CV90 នៅក្នុងប្រទេសអ៊ុយក្រែន៕
ប្រែសម្រួល ឈូក បូរ៉ា
ប្រភព ៖ AFP
Recommended for you
