តូក្យូ៖ រដ្ឋមន្ត្រីជប៉ុន បានឲ្យដឹងថា រដ្ឋាភិបាល អាចនឹងដាក់ពាក្យបណ្តឹងទៅកាន់អង្គការពាណិជ្ជកម្មពិភពលោក ជុំវិញការសម្រេចចិត្តរបស់ប្រទេសចិន ក្នុងការហាមឃាត់ការនាំចូលអាហារសមុទ្រជប៉ុនទាំងអស់ បន្ទាប់ពីទឹកវិទ្យុសកម្ម ដែលត្រូវបានព្យាបាលបានចាប់ផ្តើមត្រូវបានបញ្ចេញទៅក្នុងសមុទ្រ ពីរោងចក្រនុយក្លេអ៊ែរហ្វូគូស៊ីម៉ា។
រដ្ឋមន្ត្រីសន្តិសុខសេដ្ឋកិច្ចលោក Sanae Takaichi បានប្រាប់សន្និសីទសារព័ត៌មានថា “យើងកំពុងឈានចូលដំណាក់កាលមួយ ដែលយើងគួរតែពិចារណាលើវិធានការតបត” ប្រឆាំងនឹងការរឹតបន្តឹងការនាំចូល ដែលដាក់ដោយប្រទេសចិន រួមទាំងការដាក់ពាក្យប្តឹងទៅស្ថាប័នពាណិជ្ជកម្មពិភពលោក ប្រសិនបើ “ដាក់ការតវ៉ាតាមរយៈបណ្តាញការទូតមិនមានប្រសិទ្ធភាព”។
រដ្ឋមន្ត្រីការបរទេសលោក Yoshimasa Hayashi ក៏បានឲ្យដឹងនៅក្នុងសន្និសីទសារព័ត៌មានដាច់ដោយឡែកមួយថា ប្រទេសជប៉ុន នឹងចាត់វិធានការចាំបាច់នៅក្រោមក្របខ័ណ្ឌដូចជា WTO និងបានគូសបញ្ជាក់អំពីសារៈសំខាន់នៃ “ទំនាក់ទំនងជិតស្និទ្ធ” រវាងប្រទេសទាំងពីរ ដើម្បីរក្សាទំនាក់ទំនង ស្ថាបនា។
លោក Hayashi បានជំរុញឱ្យទីក្រុងប៉េកាំង លុបចោលជាបន្ទាន់នូវការហាមឃាត់ការនាំចូលរបស់ខ្លួន ដែលបានដាក់កាលពីថ្ងៃព្រហស្បតិ៍ភ្លាមៗបន្ទាប់ពីអគារនុយក្លេអ៊ែរបានចាប់ផ្តើមបញ្ចេញទឹកចូលទៅក្នុងមហាសមុទ្រប៉ាស៊ីហ្វិក ដោយថា វិធានការនេះគឺ “មិនផ្អែកលើមូលដ្ឋានវិទ្យាសាស្ត្រនោះទេ” ។
មហាអំណាចអាស៊ីទាំងពីរមានជម្លោះជុំវិញសុវត្ថិភាព នៃទឹក ដែលត្រូវបានបញ្ចេញចេញពីរោងចក្រថាមពលនុយក្លេអ៊ែរ Fukushima Daiichi ដែលត្រូវបានខូចខាតយ៉ាងធ្ងន់ធ្ងរដោយការរញ្ជួយដី និងរលកយក្សស៊ូណាមិ កាលពីឆ្នាំ២០១១ ដែលដាក់ភាពតានតឹងបន្ថែមទៀតលើទំនាក់ទំនងទ្វេភាគី ដែលមិនស្ថិតស្ថេររបស់ពួកគេបន្ថែមទៀត។
វាត្រូវបានគេមើលឃើញថា ជាជំហានដ៏សំខាន់មួយឆ្ពោះទៅរកការរុះរើរោងចក្រនេះ ការបង្ហូរទឹកបានចាប់ផ្តើមបន្ទាប់ពីទីភ្នាក់ងារថាមពលអាតូមិកអន្តរជាតិបានបញ្ចប់នៅក្នុងរបាយការណ៍មួយកាលពីខែមុនថា ផែនការនេះស្របតាមស្តង់ដារសុវត្ថិភាពសកល៕ ប្រែសម្រួល ឈូក បូរ៉ា
