កូរ៉េខាងជើង ធ្វើសមយុទ្ធវាយប្រហារ ដោយនុយក្លេអ៊ែរ ដោយក្លែងធ្វើជាវាយប្រហារ ទៅលើកូរ៉េខាងត្បូង

បរទេស៖ ទីភ្នាក់ងារសារព័ត៌មានរដ្ឋ KCNA របស់កូរ៉េខាងជើង បានផ្សាយថា កាលពីថ្ងៃពុធ យោធាកូរ៉េខាងជើង បានធ្វើការវាយប្រហារនុយក្លេអ៊ែរ ដោយក្លែងធ្វើជាវាយប្រហារលើ ប្រទេសកូរ៉េខាងត្បូង ដើម្បីជាការឆ្លើយតបទៅនឹង “សមយុទ្ធសង្រ្គាមឈ្លានពានបែបផ្សងព្រេង” របស់រដ្ឋាភិបាលនៅទីក្រុងសេអ៊ូល ជាមួយសហរដ្ឋអាមេរិក។

យោងតាមសារព័ត៌មាន RT ចេញផ្សាយនៅថ្ងៃទី៣១ ខែសីហា ឆ្នាំ២០២៣ បានឱ្យដឹងថា ទីភ្នាក់ងារនេះបានរាយការណ៍ ដោយដកស្រង់សេចក្តីថ្លែងការណ៍ របស់បុគ្គលិកទូទៅរបស់កងទ័ពប្រជាជនកូរ៉េ (KPA) ថា កងទ័ពប្រជាជនកូរ៉េ “បានរៀបចំសមយុទ្ធវាយប្រហារ នុយក្លេអ៊ែរយុទ្ធសាស្ត្រ ដោយក្លែងធ្វើការវាយប្រហារអ្វីគ្រប់យ៉ាង របស់សត្រូវនៅមជ្ឈមណ្ឌលបញ្ជាការសំខាន់ៗ និងទីវាលប្រតិបត្តិការនៃក្រុមយោធារបស់ ‘ROK’ កាលពីយប់ថ្ងៃពុធ” ។

សេចក្តីថ្លែងការណ៍បានបន្ថែមថា “អង្គភាពប្រដាប់អាវុធនុយក្លេអ៊ែរ យុទ្ធសាស្ត្ររបស់ KPA” បានបាញ់មីស៊ីលផ្លោងចំនួនពីរ និង “អនុវត្តបានត្រឹមត្រូវនូវបេសកកម្ម វាយប្រហារនុយក្លេអ៊ែររបស់ខ្លួន តាមរយៈការបំផ្ទុះតាមអាកាសនៅរយៈកំពស់៤០០ ម៉ែត្រពីលើកោះគោលដៅ” ។

សមយុទ្ធនេះត្រូវបានធ្វើឡើង ជាការឆ្លើយតបទៅនឹងការហោះហើរ កាលពីថ្ងៃពុធនៃយន្តហោះចម្បាំង របស់កូរ៉េខាងត្បូងជាមួយនឹង យន្តហោះទម្លាក់គ្រាប់បែកយុទ្ធសាស្ត្រ B-1B របស់អាមេរិក ជាផ្នែកនៃហ្គេមសង្គ្រាម Ulchi Freedom Shield ។ B-1B Lancer អាចផ្ទុកអាវុធនុយក្លេអ៊ែរ ហើយបានចូលរួមក្នុងសមយុទ្ធ ជាមួយកូរ៉េខាងត្បូង ចាប់តាំងពីខែវិច្ឆិកា ឆ្នាំ២០២២។

ទោះជាយ៉ាងណាក៏ដោយ យោងតាមបុគ្គលិកទូទៅរបស់ KPA យន្តហោះទម្លាក់គ្រាប់បែកកំពុងអនុវត្ត “ការវាយប្រហារនុយក្លេអ៊ែរជាមុន” ប្រឆាំងនឹងសាធារណរដ្ឋប្រជាធិបតេយ្យ ប្រជាមានិតកូរ៉េ ៕

ប្រែសម្រួលៈ ណៃ តុលា