កាធុម ៖ ប្រធានក្រុមប្រឹក្សាអធិបតេយ្យភាព អន្តរកាលរបស់ប្រទេសស៊ូដង់ និងជាអគ្គមេបញ្ជាការ នៃកងកម្លាំងប្រដាប់ អាវុធស៊ូដង់ (SAF) លោក Abdel Fattah Al-Burhan បានឲ្យដឹងថា សង្គ្រាមបច្ចុប្បន្ន អាចនាំទៅដល់ការបែកបាក់ នៃប្រទេស ប្រសិនបើមិនត្រូវ បានដោះស្រាយ។
លោក Al-Burhan បានធ្វើការកត់សម្គាល់ នៅពេលថ្លែងទៅកាន់មេដឹកនាំប៉ូលីស ស៊ូដង់នៅទីក្រុង Port Sudan ដែលជារដ្ឋធានីនៃរដ្ឋ Red Sea នៅភាគខាងកើតប្រទេសស៊ូដង់ នេះបើយោងតាមការចុះ ផ្សាយរបស់ទីភ្នាក់ងារ សារព័ត៌មានចិនស៊ិនហួ។
លោកបានបន្ដថា “សង្គ្រាមដ៏ក្ដៅគគុកនាពេលបច្ចុប្បន្ន អាចនឹងបង្កឱ្យមានការបែកបាក់នៃប្រទេសស៊ូដង់ ប្រសិនបើមិនបានដោះស្រាយឱ្យបានលឿនតាមតម្រូវការទេនោះ” ។ លោកបានសង្កត់ធ្ងន់ទៅលើសមត្ថភាពរបស់ SAF ក្នុងការបញ្ចប់សង្រ្គាម ដោយអំពាវនាវ ដល់ប្រជាពលរដ្ឋឱ្យរៀបចំខ្លួន សម្រាប់ការរៀបចំក្រោយសង្គ្រាម ។
ទន្ទឹមនឹងនេះ លោកបានអំពាវនាវដល់អ្នកប្រយុទ្ធ នៃកងកម្លាំងគាំទ្ររហ័សរហួន (RSF) ឲ្យដាក់អាវុធរបស់ពួកគេចុះ ដើម្បីសន្ដិភាពផងដែរ។មេទ័ពស៊ូដង់ បានលាតត្រដាងបន្ថែមទៀតថា RSF បានប្រព្រឹត្តឧក្រិដ្ឋកម្មសង្គ្រាម នៅទីក្រុង Darfur និងទីក្រុងកាធុម ដោយសង្កត់ធ្ងន់លើតម្រូវការ ដើម្បីទទួលខុសត្រូវ ចំពោះអ្នកទទួលខុសត្រូវ ។
ប្រទេសស៊ូដង់បាននិង កំពុងឃើញការប៉ះទង្គិចគ្នាដោយប្រដាប់អាវុធដ៏សាហាវរវាង SAF និង RSF នៅទីក្រុងកាធុម និងតំបន់ផ្សេងទៀតចាប់តាំង ពីថ្ងៃទី១៥ ខែមេសា ដែលបានបណ្តាល ឱ្យមនុស្សជាង ៣០០០នាក់បានស្លាប់ និងជាង ៦០០០នាក់បានរងរបួស នេះបើយោងតាមក្រសួង សុខាភិបាលស៊ូដង់។
មនុស្សជាង ៤,៥លាននាក់ត្រូវបានផ្លាស់ទីលំនៅក្នុង និងក្រៅប្រទេស ស៊ូដង់ ដោយសារតែជម្លោះ នេះបើយោងតាមការអាប់ដេត ចុងក្រោយដោយការិយាល័យ អង្គការសហប្រជាជាតិ សម្រាប់ការសម្របសម្រួល កិច្ចការមនុស្សធម៌៕
ប្រែសម្រួល ឈូក បូរ៉ា
