អតីតនាយករដ្ឋមន្ត្រីអ៊ីតាលី អះអាងថា បារាំងបាញ់ទម្លាក់យន្តហោះ អ្នកដំណើរសម្លាប់មនុស្សជាង៨០នាក់ កាលពីឆ្នាំ១៩៨០

បរទេស៖ អតីតនាយករដ្ឋមន្ត្រីអ៊ីតាលី លោក Giuliano Amato បានអះអាងនៅក្នុងបទសម្ភាសន៍ថ្មីមួយថា ឧប្បត្តិហេតុ “ការសម្លាប់រង្គាលនពីការធ្លាក់យន្ត្ Ustica” ក្នុងឆ្នាំ ១៩៨០ គឺបណ្តាលមកពីការប៉ុនប៉ងរបស់បារាំង និងសហរដ្ឋអាមេរិក ដើម្បីបាញ់ទម្លាក់យន្តហោះដែលពួកគេជឿថា កំពុងដឹកអតីតមេដឹកនាំរបស់ប្រទេសលីប៊ី។

យោងតាមសារព័ត៌មាន RT ចេញផ្សាយនៅថ្ងៃទី៣ ខែកញ្ញា ឆ្នាំ២០២៣ បានឱ្យដឹងថា មូលហេតុពិតប្រាកដនៃឧប្បត្តិហេតុសម្លាប់មនុស្សជាមួយនឹងជើងហោះហើរ Itavia 870 ពីទីក្រុង Bologna ទៅទីក្រុង Sicily ប្រទេសអ៊ីតាលី នៅថ្ងៃទី ២៧ ខែមិថុនា ឆ្នាំ ១៩៨០ នៅតែជាអាថ៌កំបាំង ហើយជនដៃដល់នៅតែមិនស្គាល់អត្តសញ្ញាណ។

យន្តហោះ McDonnell Douglas DC-9 បានធ្លាក់នៅចន្លោះកោះ Ponza និង Ustica ដោយបានសម្លាប់មនុស្សទាំងអស់ ៨១ នាក់ដែលនៅលើយន្តហោះនោះ។

អ្នកខ្លះជឿថា វាបណ្តាលមកពីការបំផ្ទុះគ្រាប់បែករបស់ភេរវករ ប៉ុន្តែអ្នករិះគន់បានចង្អុលទៅការខ្វះខាតភស្តុតាងនៃសំណល់ជាតិផ្ទុះនៅក្នុងកំទេចកំទីដែលត្រូវបានគេរកឃើញ។ ទ្រឹស្តីមួយទៀតអះអាងថា យន្តហោះនេះត្រូវបានបាញ់ទម្លាក់ដោយចៃដន្យនៅក្នុងការប្រយុទ្ធគ្នារវាងយន្តហោះចម្បាំងលីប៊ី បារាំង និងអាមេរិក ក្នុងការប៉ុនប៉ងធ្វើឃាតរបស់អង្គការណាតូទៅលើអ្នកនយោបាយសំខាន់របស់ប្រទេសលីប៊ី ។

លោក Amato បានអះអាងនៅក្នុងបទសម្ភាសន៍ដ៏កក្រើកមួយជាមួយ La Repubblica ដែលបានចេញផ្សាយកាលពីថ្ងៃសៅរ៍ថា “កំណែដែលអាចជឿទុកចិត្តបានបំផុត គឺការទទួលខុសត្រូវរបស់កងទ័ពអាកាសបារាំង នៅក្នុងការអនុលោមជាមួយអាមេរិក និងដែលបានចូលរួមក្នុងសង្រ្គាមនៅលើអាកាសនៅល្ងាចថ្ងៃទី២៧ ខែមិថុនា” ។

លោក Amato បានអះអាងថា “ផែនការមួយត្រូវបានដាក់ឱ្យដំណើរការ ដើម្បីវាយប្រហារយន្តហោះដែលលោក Gaddafi មេដឹកនាំលីប៊ី កំពុងហោះហើរ” ដោយទទូចថា អង្គការណាតូ ព្យាយាម “ក្លែងធ្វើសមយុទ្ធ ដោយមានយន្តហោះជាច្រើនកំពុងធ្វើសកម្មភាព ក្នុងអំឡុងពេលដែលមីស៊ីលមួយត្រូវបានគេសន្មត់ថា ត្រូវបានបាញ់ចេញ” ។

លោក Gaddafi ដែលជាមេដឹកនាំប្រទេសលីប៊ីកាលនោះ ត្រូវបានគេរាយការណ៍ថា នឹងត្រលប់មកពីកិច្ចប្រជុំនៅប្រទេសយូហ្គោស្លាវី ដោយជិះយន្តហោះយោធាឆ្លងកាត់ដែនអាកាសដូចគ្នា ប៉ុន្តែយោងទៅតាមលោក Amato , អ៊ីតាលីបានព្រមានគាត់ ( Gaddafi) ហើយមេដឹកនាំលីប៊ីបានផ្លាស់ប្តូរផែនការ។ យ៉ាងណាក៏ដោយ មន្ត្រីអង្គការណាតូ បានបដិសេធរាល់សកម្មភាពយោធានៅក្នុងតំបន់នៅយប់ នៃសោកនាដកម្មនោះកើតឡើង៕ ប្រែសម្រួលៈ ណៃ តុលា