ហ្សាកាតា៖ ប្រទេសជប៉ុន និងសមាគមប្រជាជាតិ អាស៊ីអាគ្នេយ៍ កាលពីថ្ងៃពុធ បានធ្វើឱ្យប្រសើរឡើង នូវទំនាក់ទំនង របស់ពួកគេទៅជា “ភាពជាដៃគូយុទ្ធសាស្ត្រគ្រប់ជ្រុងជ្រោយ” ដើម្បីបង្កើនកិច្ចសហប្រតិបត្តិការ ក្នុងសន្តិសុខដែនសមុទ្រ និងតំបន់ផ្សេងទៀត ចំពេលមានការកើនឡើង នៃឥទ្ធិពលរបស់ប្រទេសចិន នៅក្នុងតំបន់ដែលមានការ រីកចម្រើនយ៉ាងឆាប់រហ័ស។
ការកើនឡើងនៃទំនាក់ទំនង ដែលត្រូវបានប្រកាស នៅក្នុងកិច្ចប្រជុំកំពូលអាស៊ាន-ជប៉ុន នៅទីក្រុងហ្សាកាតា កើតឡើងនៅពេល ដែលនាយករដ្ឋមន្រ្តីជប៉ុនលោក ហ្វូមីអូ គីស៊ីដា បានបង្ហាញ ផែនការអភិវឌ្ឍន៍ ធនធានមនុស្ស របស់ប្រទេសលោកសម្រាប់មនុស្ស ៥០០០ នាក់នៅក្នុងដែនដូចជាសុវត្ថិភាពដែនសមុទ្រ និងឌីជីថលនីយកម្មក្នុងរយៈពេល ៣ឆ្នាំខាងមុខ។
ប្រទេសជប៉ុន និងមហាអំណាចផ្សេងទៀត រួមទាំង សហរដ្ឋអាមេរិក បាននិងកំពុងស្វែង រកការបង្កើន ការចូលរួមជាមួយប្លុកតំបន់ ដែលមានសមាជិកទាំង១០ ។ សម្រាប់ផ្នែករបស់ជប៉ុន ខ្លួនបានបង្ហាញ ពីគំនិតផ្តួចផ្តើមការតភ្ជាប់ដ៏ទូលំទូលាយរវាងជប៉ុន និងអាស៊ាន ដើម្បីពង្រឹងការគាំទ្រដល់ប្រទេសអាស៊ាន។
លោក គីស៊ីដា បានឲ្យដឹងនៅក្នុងសុន្ទរកថា នៅឯវេទិកាអាស៊ាន-ឥណ្ឌូ-ប៉ាស៊ីហ្វិកមុនថ្ងៃនៅពេលប្រកាសគំនិតផ្តួចផ្តើមថ្មីថា “ប្រទេសរបស់យើងនឹងរីកចម្រើន ជាមួយសមាជិកអាស៊ាន ដោយការលើកកម្ពស់កិច្ចសហប្រតិបត្តិការ បច្ចេកទេសជាមួយពួកគេ” ៕
ប្រែសម្រួល ឈូក បូរ៉ា
