បរទេស៖ កាសែត Sunday Times បានរាយការណ៍កាលពីថ្ងៃសៅរ៍ថា អ្នកស្រាវជ្រាវម្នាក់ដែលធ្វើការ ឱ្យសភាចក្រភពអង់គ្លេស និងបុរសទីពីរត្រូវបានចាប់ខ្លួនកាលពីខែមីនា ពីបទសង្ស័យថា បានធ្វើចារកម្ម (លួចយកការណ៍) ឱ្យប្រទេសចិន។
យោងតាមសារព័ត៌មាន RT ចេញផ្សាយនៅថ្ងៃទី១០ ខែកញ្ញា ឆ្នាំ២០២៣ បានឱ្យដឹងថា អ្នកស្រាវជ្រាវត្រូវបានគេរាយការណ៍ថា បានធ្វើការលើគោលនយោបាយអន្តរជាតិ ហើយមានទំនាក់ទំនងជាមួយ “សមាជិកសភាជាន់ខ្ពស់ Tory” មួយចំនួន ហើយដែលអ្នកខ្លះមានសិទ្ធិចូលប្រើ “ព័ត៌មានដែលចាត់ថ្នាក់ ឬព័ត៌មានរសើបខ្លាំង”។ ទំនាក់ទំនងរបស់បុរសនោះ ត្រូវបានគេនិយាយថា រួមមានរដ្ឋមន្ត្រីក្រសួងសន្តិសុខ Tom Tugendhat និង Alicia Kearns ប្រធានគណៈកម្មាធិការកិច្ចការបរទេសសភា។
នៅក្នុងសេចក្តីថ្លែងការណ៍ខ្លីមួយ គឺសេវាប៉ូលីស Metropolitan បានបញ្ជាក់ថា បុរសម្នាក់ដែលមានអាយុ ៣០ ឆ្នាំ ត្រូវបានចាប់ខ្លួននៅ Oxfordshire ហើយបុរសម្នាក់ទៀតដែលមានអាយុ ២០ ឆ្នាំ ត្រូវបានចាប់ខ្លួននៅ Edinburgh ក្រោមច្បាប់សម្ងាត់ផ្លូវការ។
Metropolitan បាននិយាយថា “ការស្វែងរកក៏ត្រូវបានធ្វើឡើង នៅទាំងអចលនទ្រព្យលំនៅដ្ឋាន ក៏ដូចជានៅអាសយដ្ឋានទីបី នៅភាគខាងកើតទីក្រុងឡុងដ៍”។ ជនសង្ស័យទាំងពីរត្រូវបានដោះលែងឱ្យ នៅក្រៅឃុំរហូតដល់ចុងខែតុលា។
បញ្ជាការប្រឆាំងភេរវកម្មរបស់ Met ដែលគ្រប់គ្រងឧក្រិដ្ឋកម្មទាក់ទងនឹងចារកម្ម កំពុងស៊ើបអង្កេតករណីនេះ ៕
ប្រែសម្រួលៈ ណៃ តុលា
