បរទេស៖ រដ្ឋាភិបាលទីក្រុងវ៉ាស៊ីនតោន បានព្រមានពីការដាក់ទណ្ឌកម្មថ្មី លើទាំងកូរ៉េខាងជើង និងរុស្ស៊ី ប្រសិនបើក្រុងព្យុងយ៉ាងផ្តល់អាវុធ ដល់ទីក្រុងមូស្គូចំពេល មានជម្លោះនៅអ៊ុយក្រែន។ សហរដ្ឋអាមេរិកក៏បាននិយាយដែរថា ខ្លួននឹងអនុវត្តវិធានការដែលមានស្រាប់នេះបើយោងតាម ការចេញផ្សាយរបស់ RT កាលពីថ្ងៃម្សិលមិញ។
អ្នកនាំពាក្យក្រសួងការបរទេសអាមេរិក លោក Matthew Miller បានប្រាប់អ្នកយកព័ត៌មាន កាលពីថ្ងៃអង្គារនៅក្នុងទីក្រុងវ៉ាស៊ីនតោនថា៖ ខ្ញុំនឹងរំលឹកប្រទេសទាំងពីរថា ការផ្ទេរអាវុធពីកូរ៉េខាងជើង ទៅប្រទេសរុស្ស៊ីនឹងបំពានលើដំណោះស្រាយ ជាច្រើនរបស់ក្រុមប្រឹក្សាសន្តិសុខ អង្គការសហប្រជាជាតិ។
លោកបន្តថា៖ ជាការពិតណាស់ពួកយើង បានអនុវត្តទណ្ឌកម្មរបស់យើងយ៉ាងខ្លាំងក្លា ប្រឆាំងនឹងអង្គភាពដែលផ្តល់មូលនិធិ ដល់កិច្ចខិតខំប្រឹងប្រែងសង្រ្គាមរបស់រុស្ស៊ី ហើយយើងនឹងបន្តអនុវត្តទណ្ឌកម្មទាំងនោះ ហើយនឹងមិនស្ទាក់ស្ទើរក្នុងការ ដាក់ទណ្ឌកម្មថ្មីប្រសិនបើស្ថិត នៅក្នុងសមស្របណាមួយ។
គួរឲ្យដឹងដែរថា លោក Miller បានចេញសេចក្តីថ្លែងការណ៍របស់គាត់ ត្រឹមតែប៉ុន្មានម៉ោងមុនពេលមេដឹកនាំ កូរ៉េខាងជើងលោក Kim Jong-un បានធ្វើដំណើរទៅដល់ទីក្រុង Vladivostok កាលពីថ្ងៃអង្គារសម្រាប់ការពិភាក្សា ដ៏កម្រជាមួយប្រធានាធិបតីរុស្ស៊ីលោក Vladimir Putin ។
លោក Kim ត្រូវបានគេមើលឃើញថា គឺចង់ពិភាក្សាអំពីកិច្ចសហប្រតិបត្តិការ យោធាបន្ថែមទៀតជាមួយរុស្ស៊ី នេះបើយោងតាមរបាយការណ៍ ប្រព័ន្ធផ្សព្វផ្សាយលោកខាងលិច ខណៈដែលវិមានក្រឹមឡាំងបាននិយាយថា កិច្ចប្រជុំកំពូលនេះនឹងផ្តោតលើ បញ្ហារសើបមួយចំនួនប៉ុណ្ណោះ ៕
ប្រែសម្រួល៖ ស៊ុន លី
