បរទេស៖យោងតាមការ ចេញផ្សាយរបស់ RT លោក Nikolai Patrushev លេខាធិការក្រុមប្រឹក្សា សន្តិសុខរុស្ស៊ី បានបង្ហាញកាលពីថ្ងៃអង្គារម្សិលមិញថា ប្រធានាធិបតីរុស្ស៊ី លោក Vladimir Putin នឹងជួបជាមួយប្រធានាធិបតីចិន Xi Jinping នៅទីក្រុងប៉េកាំង នៅខែក្រោយនេះ ហើយបើមិនមានអ្វីប្រែប្រួលទេនោះ។
ប្រភពដដែលបានសរសេរទៀតថា ការជួបគ្នាកម្រិតខ្ពស់នេះនឹងធ្វើឡើង ក្នុងអំឡុងពេលវេទិកាខ្សែក្រវាត់ និងផ្លូវសម្រាប់កិច្ចសហប្រតិបត្តិការអន្តរជាតិ ដែលបានកំណត់សម្រាប់ខែ តុលាដែលកន្លងមកប្រទេសចិន បានបញ្ជាក់ពីការចូលរួម របស់ប្រទេសប្រមាណ៩០ សម្រាប់ព្រឹត្តិការណ៍នេះ រួមទាំងមេដឹកនាំបរទេសដូច ជាប្រធានាធិបតីស៊ែប៊ី Aleksandar Vucic និងប្រធានាធិបតីអាហ្សង់ទីន Alberto Fernandez ជាដើម ។
ក្នុងអំឡុងកិច្ចប្រជុំនៅទីក្រុងមូស្គូ ជាមួយមន្ត្រីការទូតកំពូល របស់ចិន លោក Wang Yi កាលពីថ្ងៃអង្គារ និងលោក Patrushev បានសង្កត់ធ្ងន់ថា ទំនាក់ទំនងរវាងរុស្ស៊ី និងចិនត្រូវបានកសាងឡើង ដោយឈរលើគោលការណ៍នៃការគោរព ការមិនជ្រៀតជ្រែកក្នុងកិច្ចការផ្ទៃក្នុងរបស់គ្នាទៅវិញទៅមក និងការគាំទ្រគ្នាទៅវិញ ទៅមកនៅលើឆាកពិភពលោក។
គួរឲ្យដឹងដែរថាកិច្ច សហប្រតិបត្តិការ ផ្នែកនយោបាយ និងសេដ្ឋកិច្ចរវាងរុស្ស៊ី និងចិនមានការរីកចម្រើនយ៉ាងខ្លាំង ក្នុងប៉ុន្មានឆ្នាំថ្មីៗនេះ ជាពិសេសប្រឆាំងនឹងផ្ទៃខាងក្រោយ នៃភាពតានតឹងកើនឡើង រវាងទីក្រុងមូស្គូ និងប្រទេសលោកខាងលិច ជាពិសេសគឺជម្លោះនៅអ៊ុយក្រែន៕
ប្រែសម្រួល៖ស៊ុនលី
