បរទេស៖ ជនជាតិវៀតណាមរាប់រយនាក់បានតម្រង់ជួរដើម្បីទិញទូស័ព្ទម៉ាក iPhone ជំនាន់ចុងក្រោយនៅ Apple Stores ក្នុងប្រទេសសិង្ហបុរី និងប្រទេសថៃកាលពីថ្ងៃសុក្រ ប៉ុន្តែតម្រូវការគឺខ្ពស់ពេកសម្រាប់មនុស្សគ្រប់គ្នាក្នុងការទទួលបានអ្វីដែលពួកគេចង់បាន។
យោងតាមសារព័ត៌មាន VN EXPRESS ចេញផ្សាយនៅថ្ងៃទី២៤ ខែកញ្ញា ឆ្នាំ២០២៣ បានឱ្យដឹងថា ខណៈដែលប្រទេសថៃត្រូវបានជ្រើសរើសឱ្យស្ថិតក្នុងចំណោមទីផ្សារលំដាប់ទី១ របស់ Apple សម្រាប់ឆ្នាំទី ២ ពាណិជ្ជករវៀតណាមជាច្រើនបានជ្រើសរើសប្រទេសនេះ ដោយជឿថានឹងមានការប្រកួតប្រជែងតិចជាងមុន។ ប៉ុន្តែវាបានប្រែក្លាយថាមនុស្សជាច្រើនមានគំនិតដូចគ្នានេះ។ លោក Dinh Cong អ្នកជំនាញផ្នែកបច្ចេកវិទ្យានៅទីក្រុងហូជីមិញ បាននិយាយថា អ្វីៗមានភាពវឹកវរ ដោយសារមនុស្សជាច្រើនបានបង្ហាញខ្លួននៅ Apple Stores របស់ប្រទេសថៃ។
ហាង Apple Stores នៅ Central World ទីក្រុងបាងកក និង Iconsiam ទទួលបានចំណាត់ថ្នាក់កំពូលដែលមានមនុស្សតម្រង់ជួរច្រើន។
ពាណិជ្ជករឈ្មោះ Tuan Anh បាននិយាយថា នេះជាការកែលម្អអង្គភាពពី
កាលពីឆ្នាំមុន ដោយបង្ហាញថាអ្នកតម្រង់ជួរដំបូង និងអតិថិជនដែលបានបញ្ជាទិញមុននឹងត្រូវបានផ្តល់អាទិភាព។
ប៉ុន្តែ Thanh Tung នៅខេត្ត Quang Ninh ភាគខាងជើង បាននិយាយថា ទោះបីជាគាត់ជាអ្នកតម្រង់ជួរទី២០ ក៏ដោយ ក៏ហាងបាននិយាយថា មិនមានម៉ូដែល iPhone 15 Pro Max ដែលអាចប្រើបានទេ បន្ទាប់ពីអតិថិជនដំបូងពីរបីនាក់នោះ។
ជម្រើស Pro Max ត្រូវបានឈ្មួញវៀតណាមតាមប្រមាញ់ច្រើនបំផុត ព្រោះពួកគេអាចលក់វាក្នុងប្រទេសវៀតណាមបានរហូតដល់ទៅ ៧០ លានដុង គឺស្មើនឹង ២.៨៧២ ដុល្លារ ដែលខ្ពស់ជាងតម្លៃផ្លូវការរបស់ Apple ដល់ទៅ ៤៩ភាគរយ ៕ ប្រែសម្រួលៈ ណៃ តុលា
