បរទេស ៖ នាយករដ្ឋមន្ត្រីថៃ លោក ស្រែថា ថាវីស៊ីន បានបញ្ជាឱ្យបង្កើតគណៈកម្មាធិការមួយ ដើម្បីស៊ើបអង្កេត លើឧប្បត្តិហេតុមួយ ពាក់ព័ន្ធនឹងក្រុមមន្ត្រី នគរបាលប្រឆាំងឧក្រិដ្ឋកម្ម តាមប្រព័ន្ធអ៊ីនធឺណេត ដែលបានចុះឆែកឆេរលំនៅដ្ឋាន របស់អគ្គស្នងការរងនគរបាលជាតិ លោកឧត្តមសេនីយ ស៊ូរ៉ាឆាត កាលពីព្រឹកថ្ងៃចន្ទ ទី២៥ ខែកញ្ញា ។
យោងតាមសារព័ត៌មាន The Nation ចេញផ្សាយកាលពីថ្ងៃទី២៥ ខែកញ្ញា ឆ្នាំ២០២៣ បានឱ្យដឹងថា នាយករដ្ឋមន្ត្រីថៃ បានធានាដល់ភាគីពាក់ព័ន្ធទាំងអស់អំពីការប្រព្រឹត្តិដោយយុត្តិធម៌។ លោក ស្រែថា បញ្ជាក់ថា គណៈកម្មការស៊ើបអង្កេតត្រូវតែមានមនុស្សមកពីខាងក្រៅកម្លាំងនគរបាល ដើម្បីធានាបានយុត្តិធម៌។
លោក ស្រែថា ថាវីស៊ីន នាយករដ្ឋមន្រ្តីថៃ ដែលគ្រប់គ្រងលើ ស្នងការនគរបាលស៊ីវិលផងដែរ កំពុងនិយាយបន្ទាប់ពីក្រុមប៉ូលីសប្រឆាំងឧក្រិដ្ឋកម្ម អ៊ីនធឺណេតចំនួន ៣០ នាក់ដែលមានដីកាស្វែងរក ដែលចេញដោយតុលាការបានព្យាយាមឆែកឆេរ លំនៅដ្ឋានរបស់លោកឧត្តមសេនីយ ស៊ូរ៉ាឆាត ជុំវិញការចោទប្រកាន់ថា ជាប់ពាក់ព័ន្ធ ក្នុងការលេងល្បែងអនឡាញខុសច្បាប់ដោយលោក ស៊ូរ៉ាឆាត និង ឬអ្នកក្រោមបង្គាប់របស់លោក។
លោក ស្រែថា បាននិយាយថា លោកបានទទួលរបាយការណ៍ដំបូងអំពីបញ្ហានេះ ប៉ុន្តែមិនទាន់មានព័ត៌មានបន្ថែមទៀតទេរហូតមកដល់ពេលនេះ៕
ប្រែសម្រួលៈ ណៃ តុលា
