បរទេស ៖ នាយករដ្ឋមន្ត្រីថៃ ស្រែថា ថាវីស៊ីន បានដឹកនាំពិធីទទួលស្វាគមន៍ភ្ញៀវទេសចរចិន នៅអាកាសយានដ្ឋានសុវណ្ណភូមិ និងនៅទីក្រុងបាងកក កាលពីថ្ងៃចន្ទ ដោយកត់សម្គាល់ការចាប់ផ្តើម នៃការលើកលែងទិដ្ឋាការ ឬគោលនយោបាយគ្មានទិដ្ឋាការ។
យោងតាមសារព័ត៌មាន The Nation ចេញផ្សាយ កាលពីថ្ងៃទី២៥ ខែកញ្ញា ឆ្នាំ២០២៣ បានឱ្យដឹងថា នាយករដ្ឋមន្ត្រីថៃ បានអញ្ជើញជាអធិបតី ក្នុងពិធីស្វាគមន៍ភ្ញៀវទេសចរចិនដែលមកដល់ តាមជើងហោះហើរ XJ 761 ដំណើរការដោយក្រុមហ៊ុន Thai AirAsia X ហោះហើរពីទីក្រុង Xian ខេត្ត Shaanxi ទៅកាន់ព្រលានយន្តហោះសុវណ្ណភូមិ ។
ជើងហោះហើរនេះ បាននាំអ្នកដំណើរចំនួន ៣៤១ នាក់ ដែលជាអ្នកទេសចរដំបូងគេ មកពីប្រទេសចិន ដែលបានទទួលគោលនយោបាយ លើកលែងទិដ្ឋាការ របស់រដ្ឋាភិបាលថៃ សម្រាប់អ្នកធ្វើដំណើរដែលកាន់លិខិតឆ្លងដែន ឬឯកសារធ្វើដំណើររបស់ប្រទេសចិន និងកាហ្សាក់ស្ថាន។ គោលនយោបាយនេះចូលជាធរមាន ចាប់ពីថ្ងៃទី ២៥ ខែកញ្ញា ឆ្នាំ ២០២៣ ដល់ថ្ងៃទី ២៩ ខែកុម្ភៈ ឆ្នាំ ២០២៧។
អាជ្ញាធរទេសចរណ៍ថៃ (TAT) បានរៀបចំពិធីស្វាគមន៍ភ្ញៀវទេសចរចិន និងកាហ្សាក់ស្ថាននៅអាកាសយានដ្ឋានធំៗ ចំនួនបួនគឺ សុវណ្ណភូមិ ដុនមឿង ឈៀងម៉ៃ និង អាកាសយានដ្ឋាន ភូកេត ។
វិធានការមួយក្នុង ចំណោមវិធានការ ជាច្រើនរបស់ថៃ គឺវិធីសាស្រ្តសកម្ម ក្នុងការធ្វើឱ្យប្រសើរឡើង នូវភាពងាយស្រួល នៃការធ្វើដំណើរទៅកាន់ប្រទេសថៃ តាមរយៈគោលនយោបាយលើកលែងទិដ្ឋាការ។ ទាំងប្រទេសចិន និងកាហ្សាក់ស្ថានត្រូវបានចាត់ទុកថា ជាទីផ្សារដែលមានសក្តានុពលខ្ពស់ និងមានអត្រាកំណើន គួរឱ្យកត់សម្គាល់ ដែលមានសារៈសំខាន់សម្រាប់ការងើបឡើងវិញ ទាំងមូលនៃឧស្សាហកម្មទេសចរណ៍ថៃ៕
ប្រែសម្រួលៈ ណៃ តុលា
