វៀងច័ន្ទ៖ ប្រធានាធិបតីឡាវ លោក ថងលូន ស៊ីស៊ូលីត បានណែនាំឲ្យក្រសួងការពារជាតិ និងក្រសួងសន្តិសុខសាធារណៈ បង្កើនកិច្ចខិតខំប្រឹងប្រែង ដើម្បីពង្រឹងសន្តិសុខជាតិ នេះបើយោងតាមការចុះផ្សាយ របស់ទីភ្នាក់ងារសារព័ត៌មាន ចិនស៊ិនហួ។
លោក ថងលូន បានកោតសរសើរ ចំពោះការងារដែលទទួលបានជោគជ័យ ដោយក្រសួងទាំងពីរ ដោយថា កងទ័ព និងកងកម្លាំងសន្តិសុខ ត្រូវបានដាក់យ៉ាងល្អ ដើម្បីបន្តធានាស្ថិរភាពនយោបាយ នេះបើតាមការចុះ ផ្សាយសារព័ត៌មាន Laophattana។
លោកបានណែនាំឲ្យក្រសួងទាំងពីររក្សាសន្តិភាពឲ្យបានគ្រប់ជ្រុងជ្រោយ កសាងមូលដ្ឋាននយោបាយរឹងមាំជាងមុន សម្រាប់ការអភិវឌ្ឍជនបទឲ្យបានទូលំទូលាយ និងទប់ស្កាត់ដាច់ខាតរាល់ ឧបាយកលពីកម្លាំងអរិភាព។
លោក ថងលូន ក៏បានអំពាវនាវ ឱ្យមានកិច្ចសហប្រតិបត្តិការកាន់តែជិតស្និទ្ធ ជាមួយបណ្តាប្រទេសសង្គមនិយមជាបងប្អូន និងប្រទេសជាមិត្តផ្សេងទៀត ដែលកំពុងមានការរីកចម្រើន ដើម្បីពង្រឹងការអភិវឌ្ឍកងកម្លាំងយោធា និងសន្តិសុខរបស់ប្រទេសឡាវ៕
ប្រែសម្រួល ឈូក បូរ៉ា
