បរទេស៖ បុគ្គលិកព្រឹទ្ធសភាម្នាក់ បានប្រាប់សារព័ត៌មាន Politico ថា សាររាប់ម៉ឺន ត្រូវបានលួចពីក្រសួងការបរទេស សហរដ្ឋអាមេរិក ក្នុងការវាយប្រហារ តាមអ៊ីនធឺណិតដ៏ធំមួយ កាលពីដើមរដូវក្តៅនេះ។ ការលួចចូលនេះ ត្រូវបានគេនិយាយថា បានកំណត់គោលដៅលើប្រធាន ពាណិជ្ជកម្មអាមេរិក និងអ្នកការទូតកំពូល របស់ក្រុងវ៉ាស៊ីនតោន ប្រចាំប្រទេសចិន គឺឯកអគ្គរដ្ឋទូត Nicholas Burns។
យោងតាមសារព័ត៌មាន RT ចេញផ្សាយ នៅថ្ងៃទី២៨ ខែកញ្ញា ឆ្នាំ២០២៣ បានឱ្យដឹងថា មន្ត្រីក្រសួងការបរទេស បានផ្តល់ព័ត៌មានលម្អិតថ្មី ស្តីពីការរំលោភបំពាន ក្នុងអំឡុងពេលសន្និសីទ បិទទ្វារកាលពីថ្ងៃពុធដោយនិយាយថា ភាគច្រើននៃគណនីអ៊ីម៉ែលរបស់រដ្ឋាភិបាលទាំងដប់ ដែលរងផលប៉ះពាល់ ត្រូវបានគ្រប់គ្រងដោយមនុស្សដែលធ្វើការលើ “កិច្ចខិតខំប្រឹងប្រែងការទូត ឥណ្ឌូប៉ាស៊ីហ្វិក” , នេះបើតាមសារព័ត៌មាន Politico បានរាយការណ៍ដោយដកស្រង់ បុគ្គលិកដែលមិនបញ្ចេញឈ្មោះសម្រាប់ Eric Schmitt សមាជិកព្រឹទ្ធសភាមកពី គណបក្សសាធារណរដ្ឋ។
បុគ្គលិករូបនោះបាននិយាយថា “ក្នុងចំណោមព័ត៌មានរសើបបំផុតដែលត្រូវបានលួច គឺជាកម្មវិធីធ្វើដំណើររបស់ជនរងគ្រោះ និងការពិភាក្សាការទូត” ដោយកត់សម្គាល់ថា លេខសន្តិសុខ Social Security ចំនួន ១០ អាចចូលប្រើបានក្នុងអំឡុងពេល hack ។
ការវាយប្រហារតាមអ៊ីនធឺណិត ត្រូវបានរាយការណ៍ជាលើកដំបូង នៅក្នុងខែកក្កដាដោយក្រុមហ៊ុន Microsoft ដែលបានកំណត់ការស្តីបន្ទោសលើ “តួអង្គគំរាមកំហែងដែលមានមូលដ្ឋាន នៅប្រទេសចិន” ដែលត្រូវបានចោទប្រកាន់ថា គាំទ្រដោយរដ្ឋាភិបាល នៅទីក្រុងប៉េកាំង។ នៅក្នុងការបង្ហោះក្នុងប្លក់ ដែលចេញផ្សាយ នៅពេលនោះ ក្រុមហ៊ុនក៏បាន និយាយផងដែរថា ពួក Hacker មាន “គោលបំណងចារកម្ម” ប៉ុន្តែបាន និយាយថា ការសន្និដ្ឋានរបស់ខ្លួនត្រូវ បានធ្វើឡើងដោយ “ទំនុកចិត្តកម្រិតមធ្យម” ៕
ប្រែសម្រួលៈ ណៃ តុលា
