បរទេស៖ រដ្ឋអាជ្ញារបស់កោះតៃវ៉ាន់ កំពុងស៊ើបអង្កេតការចោទប្រកាន់ ដែលព័ត៌មានអំពីនាវាមុជទឹកផលិត ក្នុងស្រុកដំបូងរបស់ខ្លួនត្រូវបាន បែកធ្លាយដល់ទីក្រុងប៉េកាំង។ នាវាមុជទឹកដែលត្រូវបានគេដាក់ឈ្មោះថា “Hai Kun” ជាភាសាចិន និង “Narwhal” ជាភាសាអង់គ្លេស ត្រូវបានដាក់បង្ហាញកាលពីថ្ងៃព្រហស្បតិ៍។
យោងតាមសារព័ត៌មាន RT ចេញផ្សាយនៅថ្ងៃទី៣ ខែតុលា ឆ្នាំ២០២៣ បានឱ្យដឹងថា ការស៊ើបអង្កេតនេះត្រូវបានបើក បន្ទាប់ពីប្រធានកម្មវិធីនាវាមុជទឹកការពារក្នុងស្រុក Huang Shu-kuang បានប្រាប់ប្រព័ន្ធផ្សព្វផ្សាយថា អ្នកម៉ៅការម្នាក់ដែលមិនបានទទួលការដេញថ្លៃ បានធ្វើឱ្យលេចធ្លាយព័ត៌មានអំពី គម្រោងនេះទៅកាន់ទីក្រុងប៉េកាំង។ លោក Huang ក៏បានចោទថា សមាជិកសភាតៃវ៉ាន់ដែលមិនបញ្ចេញឈ្មោះបានធ្វើឲ្យវាមាន ការលំបាកក្នុងការទិញឧបករណ៍សំខាន់ៗ។
ការអត្ថាធិប្បាយរបស់លោក Huang បានបង្កការខឹងសម្បារនៅទីក្រុងតៃប៉ិ ដោយការិយាល័យរដ្ឋអាជ្ញាកំពូល បានប្រកាសពីការស៊ើបអង្កេតលើបញ្ហានេះ។ វាបាននិយាយកាលពីថ្ងៃចន្ទថា ការចោទប្រកាន់នេះបានទាក់ទាញ “ការយកចិត្តទុកដាក់យ៉ាងខ្លាំង” ហើយថា រដ្ឋអាជ្ញាត្រូវបានណែនាំឱ្យ “ស៊ើបអង្កេតករណីនេះឱ្យបានឆាប់តាមដែលអាច ធ្វើទៅបានដើម្បីការពារសន្តិសុខជាតិ” ។
នាវាមុជទឹកដែលគ្រោងនឹងចូលរួម ជាមួយកងនាវារបស់តៃវ៉ាន់នៅឆ្នាំ ២០២៥ គឺជាការប៉ុនប៉ងដើម្បីពង្រឹងកងទ័ពជើងទឹក របស់កោះនេះក្នុងអំឡុងពេលភាពតានតឹង កើនឡើងរបស់ទីក្រុងតៃប៉ិជាមួយចិនដីគោក ដែលបន្តចាត់ទុកតៃវ៉ាន់ជាទឹកដីរបស់ខ្លួន ។
ថ្មីៗនេះ ក្រសួងការពារជាតិតៃវ៉ាន់ បានរាយការណ៍ពីសកម្មភាព “មិនប្រក្រតី” នៃយន្តហោះយោធា និងនាវាចម្បាំងរបស់ទីក្រុងប៉េកាំង ជុំវិញកោះនេះ ៕
ប្រែសម្រួលៈ ណៃ តុលា
