យេរ៉ូសាឡឹម៖ ប្រភពពីទីភ្នាក់ងារ Xinhua បានផ្សព្វផ្សាយនៅថ្ងៃទី៩ ខែតុលា ឆ្នាំ២០២៣ថា កាលពីថ្ងៃអាទិត្យ គណៈរដ្ឋមន្ត្រីរបស់ប្រទេសអ៊ីស្រាអ៊ែល បានប្រកាសអំពី “ស្ថានភាពសង្រ្គាម” បន្ទាប់ពីមានការវាយប្រហារ ដ៏គួរឱ្យភ្ញាក់ផ្អើលដ៏ធំមួយ ដែលបានធ្វើឡើង ដោយក្រុមហាម៉ាស គិតមកដល់ពេលនេះ បានសម្លាប់មនុស្សអស់យ៉ាងហោចណាស់ ៧០០នាក់ នៅក្នុងប្រទេសអ៊ីស្រាអែល ខណៈដែលការសងសឹក តាមដែនអាកាសរបស់អ៊ីស្រាអែល បានសម្លាប់មនុស្ស យ៉ាងហោចណាស់ ៤២៣នាក់នៅតំបន់ ហ្គាហ្សា ។
កងទ័ពអ៊ីស្រាអែល ហៅកាត់ថា (IDF)បានបន្តការវាយប្រហារតាមដែនអាកាសយ៉ាងខ្លាំងរបស់ខ្លួន ទៅលើគោលដៅនានា នៅតំបន់ហ្គាហ្សា កាលពីថ្ងៃអាទិត្យ ខណៈដែលក្រុមសកម្មប្រយុទ្ធហាម៉ាស កំពុងប្រយុទ្ធជាមួយទាហានអ៊ីស្រាអែល នៅលើទឹកដីអ៊ីស្រាអែល។
លោក Daniel Hagari អ្នកនាំពាក្យ IDF បានឲ្យដឹងថា ក្រុមសកម្មប្រយុទ្ធហាម៉ាស នៅតែគ្រប់គ្រងសហគមន៍ជាច្រើននៅភាគខាងត្បូងនៃប្រទេសអ៊ីស្រាអែល កាលពីល្ងាចថ្ងៃអាទិត្យ ខណៈដែល IDF បានចូលរួមនៅក្នុងការប្រយុទ្ធគ្នាដោយកាំភ្លើងជាមួយពួកគេ ។
លោក Zaka ជាក្រុមការងារសេវាសង្គ្រោះ របស់អ៊ីស្រាអែល បានឲ្យដឹងនៅក្នុងសេចក្តីថ្លែងការណ៍មួយថា ខ្លួនបានប្រមូលអដ្ឋិធាតុ របស់យុវនារី និងបុរសប្រហែល២៦០នាក់ ដែលពួកគេកំពុងជប់លៀង នៅឯពិធីបុណ្យ Nova ដែលជាព្រឹត្តិការណ៍តន្ត្រី ក្រៅនៅតំបន់វាលស្រែ ជនបទក្បែររបង រវាងតំបន់ហ្គាហ្សារ និងដែនដីអ៊ីស្រាអែល ។
អ្នកចូលរួម នៅក្នុងពិធីបុណ្យជាច្រើននាក់ នៅតែបាត់ខ្លួនកាលពីយប់ថ្ងៃអាទិត្យ ។ ប្រព័ន្ធផ្សព្វផ្សាយសង្គមបានផ្សាយថា មានក្រុមមនុស្សជាច្រើន ដែលកំពុងព្យាយាមស្វែងរក សាច់ញាតិ និងមិត្តភក្តិរបស់ពួកគេ បន្ទាប់ពីក្រុមសកម្មប្រយុទ្ធហាម៉ាស បានវាយឆ្មក់ចូលមកក្នុងពិធីបុណ្យ និងទីតាំងផ្សេងទៀតនៅក្នុងតំបន់ ដែលជាផ្នែកនៃការវាយប្រហារដ៏គួរឱ្យភ្ញាក់ផ្អើល ដ៏ធំមកលើអ៊ីស្រាអែល ដែលរួមមានការបាញ់គ្រាប់រ៉ុក្កែត រាប់ពាន់គ្រាប់ទៀតផង ៕
ដោយ៖ ម៉ៅ បុប្ផាមករា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
