បរទេស៖ ការវាយប្រហារដ៏ធំដែលធ្វើឡើងដោយក្រុមសកម្មប្រយុទ្ធហាម៉ាសប្រឆាំងនឹងអ៊ីស្រាអែលកាលពីថ្ងៃទី ៧ ខែតុលា អមដោយការបាញ់គ្រាប់មីស៊ីលជាបន្តបន្ទាប់ ដែលភាគច្រើនគ្រាប់មីស៊ីលទាំងនោះអាចគេចផុតពីប្រព័ន្ធការពារដែនអាកាសរបស់អ៊ីស្រាអែល និងវាយប្រហារគោលដៅរបស់ពួកគេ។
យោងតាមសារព័ត៌មាន sputnik ចេញផ្សាយនៅថ្ងៃទី៩ ខែតុលា ឆ្នាំ២០២៣ បានឱ្យដឹងថា ប្រព័ន្ធការពារដែនអាកាស Iron Dome របស់អ៊ីស្រាអែល ត្រូវបានគេចាត់ទុកថាជាប្រព័ន្ធការពារដ៏ល្អបំផុតមួយនៅក្នុងពិភពលោក។ នោះបាននិយាយថា ប្រព័ន្ធការពារដែនអាកាស Iron Dome ហាក់ដូចជាបរាជ័យក្នុងការស្ទាក់ទាំងស្រុងនូវមីស៊ីលរបស់ប៉ាឡេស្ទីនកាលពីថ្ងៃសៅរ៍។
ដោយអត្ថាធិប្បាយលើការបរាជ័យនេះ អ្នកប្រវត្តិសាស្ត្រយោធារុស្ស៊ី និងជានាយកសារមន្ទីរនៃកងកម្លាំងការពារដែនអាកាស Yuri Knutov បានចង្អុលបង្ហាញថា ខណៈដែល Iron Dome គឺជាប្រព័ន្ធការពារដែនអាកាសទាន់សម័យ និងទំនើបបំផុតនោះ វាមានគុណវិបត្តិដែលអាចកេងប្រវ័ញ្ចដោយសត្រូវណាមួយផងដែរ។
សម្រាប់ហេតុផលមួយ គឺ Iron Dome តែមួយអាចការពារតំបន់តូចមួយដែលមានផ្ទៃដីប្រហែល ១៥០ គីឡូម៉ែត្រការ៉េ។ ទីពីរ លោក Knutov បានកត់សម្គាល់ថា Iron Dome មានប្រសិទ្ធភាពខ្លាំងនៅពេលដោះស្រាយជាមួយនឹងចំនួនតិចតួចនៃមីស៊ីលបាញ់ចូលទាំងអស់ ដែលចូលទៅពីទិសដៅតែមួយ។
លោកបានអះអាងថា៖ «ក្នុងករណីមានការបាញ់ផ្លោងច្រើនជាងនេះដែលពាក់ព័ន្ធនឹងគ្រាប់មីស៊ីលប្រហែល ១០០ គ្រាប់ ជាធម្មតា Iron Dome បរាជ័យក្នុងការបំពេញការងាររបស់ខ្លួន ហើយគ្រាប់មីស៊ីលរហូតដល់ ៩០ ភាគរយបានហោះផុតប្រព័ន្ធការពារនេះ និងវាយប្រហារគោលដៅដែលបានគ្រោងទុក»។
អ្នកប្រវត្ដិសាស្រ្ដរូបនេះក៏បានសង្កេតឃើញថា ក្រុមសកម្មប្រយុទ្ធហាម៉ាសមានចេតនាបាញ់គ្រាប់មីស៊ីលច្រើនពីទិសដៅផ្សេងៗគ្នា ជាក់ស្តែងក្នុងគោលបំណងដើម្បីសន្ធប់លើតំបន់ការពារ Iron Dome របស់អ៊ីស្រាអែល៕ ប្រែសម្រួលៈ ណៃ តុលា
