បរទេស ៖ ការចូលដោយគ្មានទិដ្ឋាការ សម្រាប់អ្នកទេសចររុស្ស៊ី ត្រូវបានពន្យារពេលពី ៣០ ថ្ងៃទៅដល់ ៩០ ថ្ងៃ ដោយចាប់ផ្តើមពីថ្ងៃទី ១ ខែវិច្ឆិកា និងមានរយៈពេលរហូតដល់ថ្ងៃទី ៣០ ខែមេសា, នេះបើតាមនាយករដ្ឋមន្ត្រីថៃ បានប្រកាសបន្ទាប់ពីកិច្ចប្រជុំគណៈរដ្ឋមន្ត្រីកាលពីថ្ងៃចន្ទ។
យោងតាមសារព័ត៌មាន The Nation របស់ថៃចេញផ្សាយកាលពីថ្ងៃទី១៦ ខែតុលា ឆ្នាំ២០២៣ បានឱ្យដឹងថា នាយករដ្ឋមន្ត្រីថៃ លោក សេដ្ឋា ថាវីស៊ីន បានប្រាប់អ្នកសារព័ត៌មានថា ការពង្រីកពេលវេលានៃការចូលប្រទេសថៃ ដោយគ្មានទិដ្ឋាការសម្រាប់ជនជាតិរុស្ស៊ីនឹងជំរុញទេសចរណ៍នៅក្នុងប្រទេសថៃ។
លោក សេដ្ឋា ដែលជារដ្ឋមន្ត្រីក្រសួងហិរញ្ញវត្ថុផងដែរ នោះបាននិយាយថា គោលនយោបាយនេះ ត្រូវបានបង្កើតឡើង ដើម្បីសម្រួលដល់ភ្ញៀវទេសចរ ដែលទៅទស្សនាប្រទេសថៃ ដើម្បីគេចពីរដូវរងារុស្ស៊ី ដ៏ត្រជាក់ចាប់ពីខែធ្នូដល់ខែមីនា។
នាយករដ្ឋមន្ត្រីថៃ ក៏បានបង្ហាញពីផែនការ នឹងជួបពិភាក្សាជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅក្នុងកិច្ចប្រជុំវេទិកាខ្សែក្រវ៉ាត់ និងផ្លូវលើកទី៣ សម្រាប់កិច្ចសហប្រតិបត្តិការអន្តរជាតិនៅទីក្រុងប៉េកាំង ចាប់ពីថ្ងៃទី ១៦ ដល់ថ្ងៃទី ២១ ខែតុលា ផងដែរ។
ប្រទេសថៃទទួលបានភ្ញៀវទេសចរបរទេសត្រឹមតែជាង ២០ លាននាក់ ក្នុងរយៈពេល៩ខែដំបូង នៃឆ្នាំ ២០២៣ (ខែមករា ដល់ខែកញ្ញា) ដោយអ្នកទេសចររុស្ស៊ី ជាប់ចំណាត់ថ្នាក់ទី ៥ មានចំនួន ៩៩៤.៤៣១ នាក់ នេះបើយោងតាមទិន្នន័យ របស់រដ្ឋាភិបាល។
ចំនួនអ្នកមកដល់ខ្ពស់បំផុត គឺមកពីម៉ាឡេស៊ី (៣.២៨០.៦២២នាក់) បន្ទាប់មកជនជាតិចិន (២.៥០៩.៦៩៨នាក់) កូរ៉េខាងត្បូង (១.១៩៧.៧៦៣នាក់) និងភ្ញៀវឥណ្ឌា (១.១៦៥.៩៣៥នាក់)។
រដ្ឋបាលរបស់លោកស្រី បានផ្តល់ជូនអ្នកធ្វើដំណើរពីប្រទេសចិន និងកាហ្សាក់ស្ថាន រួចហើយនូវការចូលដោយគ្មានទិដ្ឋាការរយៈពេល ៣០ ថ្ងៃ ចាប់ពីថ្ងៃទី ២៥ ខែកញ្ញា រហូតដល់ចុងខែកុម្ភៈ ឆ្នាំក្រោយ ៕
ប្រែសម្រួលៈ ណៃ តុលា
