អតីតនាយករដ្ឋមន្ត្រីថៃ លោក ប្រាយុទ្ធ ចាន់អូចា ទៅវិស្សមកាលនៅជប៉ុន ជាលើកដំបូងជាមួយគ្រួសារ បន្ទាប់ពីចាញ់ ក្នុងការបោះឆ្នោត និងសន្យាលាឈប់ពីឆាកនយោបាយ

បរទេស៖ បន្ទាប់ពីចាញ់ក្នុងការបោះឆ្នោតជាតិកាលពីថ្ងៃទី ១៤ ឧសភា និងសន្យាលាឈប់ពីឆាកនយោបាយ, ទីបំផុតអតីតនាយករដ្ឋមន្ត្រីថៃ លោក ប្រាយុទ្ធ ចាន់អូចា បានទៅវិស្សមកាលជាលើកដំបូងក្នុងរយៈពេល ១០ ឆ្នាំ។

យោងតាមសារព័ត៌មាន The Naiton ចេញផ្សាយនៅថ្ងៃទី១៧ ខែតុលា ឆ្នាំ២០២៣ បានឱ្យដឹងថា លោក Thanakorn Wangboonkongchana សមាជិកសភាក្នុងបញ្ជីគណបក្ស United Nation និងជាអតីតជំនួយការរបស់លោក ប្រាយុទ្ធ បាននិយាយនៅក្នុងហ្វេសប៊ុកថា អតីតនាយករដ្ឋមន្ត្រីកំពុងសម្រាកវិស្សមកាលនៅប្រទេសជប៉ុន។

លោក Thanakorn Wangboonkongchana បានបង្ហោះដោយសរសេរថា “Uncle Tu [ឈ្មោះហៅក្រៅរបស់លោក ប្រាយុទ្ធ] បានប្រាប់ [ខ្ញុំ] ថា នេះជាលើកដំបូងក្នុងរយៈពេល ១០ ឆ្នាំដែលគាត់ធ្វើដំណើរទៅក្រៅប្រទេសជាមួយគ្រួសារនេះ។ ដូច្នេះ ខ្ញុំបានប្រាប់គាត់ថា ចូរមានវិស្សមកាលដ៏រីករាយ ខណៈដែលអាកាសធាតុនៅប្រទេសជប៉ុនឥឡូវរីករាយ»។

លោក Thanakorn ដែលជារដ្ឋមន្ត្រីគណៈរដ្ឋមន្ត្រីក្នុងរដ្ឋាភិបាលមុន ត្រូវបានគេចាត់ទុកថាជាដៃស្តាំរបស់លោក ប្រាយុទ្ធ ចាន់អូចា។

យោងតាមសេចក្តីរាយការណ៍ព័ត៌មាន អតីតនាយករដ្ឋមន្ត្រីថៃ លោក ប្រាយុទ្ធ បានឡើងយន្តហោះទៅកាន់ប្រទេសជប៉ុនជាមួយក្រុមគ្រួសារកាលពីថ្ងៃអាទិត្យ។ ទោះបីជាជីវិតនយោបាយរបស់លោក ប្រាយុទ្ធ បានបញ្ចប់ក៏ដោយ ក៏ការងាររបស់លោកមិនទាន់ចប់នៅឡើយ៕ ប្រែសម្រួលៈ ណៃ តុលា