យេរ៉សាឡឹម៖ នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ កាលពីថ្ងៃពុធ បានជួបជាមួយប្រធានាធិបតីអាមេរិកលោក ចូ បៃដិន ក្នុងប្រទេសអ៊ីស្រាអែល ជាកន្លែងដែលពួកគេបានយល់ព្រមលើជំនួយយោធារបស់សហរដ្ឋអាមេរិក “ដែលមិនធ្លាប់មានពីមុនមក” ដល់អ៊ីស្រាអែល ក្នុងជម្លោះដែលកំពុងបន្តជាមួយក្រុមហាម៉ាស នៅហ្គាហ្សា និងក្រុមហេសបូឡា នៅលីបង់។
នៅក្នុងសេចក្តីថ្លែងការណ៍ផ្សាយមួយ លោក ណេតាន់យ៉ាហ៊ូ បានឲ្យដឹងថា រូបលោក និងលោក បៃដិន ដែលបានមកដល់នៅពេលព្រឹក សម្រាប់ដំណើរទស្សនកិច្ចរយៈពេលខ្លីទៅកាន់ប្រទេសអ៊ីស្រាអែល បានយល់ព្រមលើ “សកម្មភាព និងកិច្ចសហប្រតិបត្តិការ ដែលធានាការបន្តនៃសង្រ្គាមយុត្តិធម៌របស់យើង” ។
លោក បៃដិន ដែលបានធ្វើដំណើរត្រឡប់ទៅទីក្រុងវ៉ាស៊ីនតោន វិញនៅពេលរសៀល បន្ទាប់ពីកិច្ចប្រជុំកំពូលអារ៉ាប់ ៤ផ្លូវដែលបានគ្រោងទុកមុននៅហ្ស៊កដានី ត្រូវបានលុបចោលនោះ បានឲ្យដឹងក្នុងអំឡុងពេលស្នាក់នៅរយៈពេលខ្លីរបស់លោកថា មន្ទីរបញ្ចកោណបង្ហាញថា ការបំផ្ទុះនៅលើមន្ទីរពេទ្យ Al-Ahli Arabi Baptist កាលពីថ្ងៃអង្គារ គឺបណ្តាលមកពី “ក្រុមផ្សេងទៀត” និងមិនមែនជាការវាយប្រហារតាមអាកាសរបស់អ៊ីស្រាអែលនោះទេ។
ចលនាតស៊ូអ៊ីស្លាមប៉ាឡេស្ទីន (ហាម៉ាស) បានឲ្យដឹងថា ការវាយប្រហារតាមអាកាសរបស់អ៊ីស្រាអែល បណ្តាលឱ្យមានការផ្ទុះនៅក្នុងមន្ទីរពេទ្យ ដែលបានសម្លាប់មនុស្សយ៉ាងហោចណាស់ ៤៧១នាក់។
អ៊ីស្រាអែលបានបញ្ចេញការស្ទាក់ចាប់ទំនាក់ទំនងរវាងប្រតិបត្តិករហាម៉ាស់ពីរនាក់ពិភាក្សាពីរបៀប ដែលមន្ទីរពេទ្យត្រូវបានវាយប្រហារដោយការបាញ់គ្រាប់រ៉ុក្កែត ដែលបរាជ័យ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
អ្នកនាំពាក្យកងកម្លាំងការពារអ៊ីស្រាអែល (IDF) លោក Daniel Hagari បានបង្ហាញខ្សែអាត់សំឡេងក្នុងអំឡុងពេលសន្និសីទសារព័ត៌មានមួយ ដោយបដិសេធការទទួលខុសត្រូវរបស់អ៊ីស្រាអែល ចំពោះការបំផ្ទុះនេះ និងបានចោទប្រកាន់ក្រុមជីហាតអ៊ីស្លាមប៉ាឡេស្ទីន (PIJ) ពីការបាញ់រ៉ុក្កែតបរាជ័យ។
នៅក្នុងសំឡេង បុគ្គលពីរនាក់អាចត្រូវបានគេឮកំពុងសន្ទនាជាភាសាអារ៉ាប់ តាមរយៈការហៅទូរសព្ទ។ ក្នុងអំឡុងពេលនៃការសន្ទនា មនុស្សម្នាក់ប្រាប់អ្នកផ្សេងទៀតថា ការផ្ទុះនេះបណ្តាលមកពីការបាញ់គ្រាប់រ៉ុក្កែតដោយក្រុម PIJ ដែលជាក្រុមប្រដាប់អាវុធនៅហ្គាហ្សា។
យោងតាមលោក Hagari គ្រាប់រ៉ុក្កែត ដែលបរាជ័យ ដែលផ្ទុកបន្ទុកជំរុញការបញ្ឆេះត្រូវបានបាញ់ចេញពីទីតាំងក្បែរមន្ទីរពេទ្យ។
លោកក៏បានបង្ហាញពីរូបថតពីលើអាកាស និងរូបភាពអ៊ីនហ្វ្រារ៉េដនៃទីតាំងនៃការផ្ទុះ ដែលប្រមូលបានដោយយោធាអ៊ីស្រាអែល។ លោកបានបន្តថា”ការវិភាគលើរូបភាពពីលើអាកាសរបស់យើង បញ្ជាក់ថា មិនមានការវាយប្រហារផ្ទាល់មកលើមន្ទីរពេទ្យនោះទេ”៕
ប្រែសម្រួល ឈូក បូរ៉ា
