បរទេស ៖ ប្រធានាធិបតីអាមេរិកលោក Joe Biden បាននិយាយ កាលពីថ្ងៃព្រហស្បតិ៍មិ្សលមិញថា លោកមិនមានទំនុកចិត្តលើចំនួនអ្នកស្លាប់ និងរបួសដែលត្រូវបានដកស្រង់ ដោយអាជ្ញាធរប៉ាឡេស្ទីន នៅតំបន់ហ្គាហ្សា ចំពេលមានការទម្លាក់គ្រាប់បែក ដែលកំពុងបន្តលើទឹកដី ដោយកងកម្លាំងការពារ អ៊ីស្រាអែល (IDF)នោះទេ ។
យោងតាមការចេញផ្សាយរបស់ RT ក្រសួងសុខាភិបាល ដែលគ្រប់គ្រងដោយក្រុមហាម៉ាស បានអះអាងថា រហូតមកដល់ពេលនេះមនុស្សជាង ៧ ពាន់នាក់ត្រូវបានសម្លាប់ ដោយសារការវាយប្រហារជាច្រើនដងផ្ទួនៗ ពីសំណាក់កងកម្លាំងយោធា របស់អ៊ីស្រាអែល ។
មេដឹកនាំអាមេរិករូបនេះ បានថ្លែងបដិសេធតួលេខនេះ នៅក្នុងសន្និសីទសារព័ត៌មានមួយ នៅសេតវិមានហើយបន្ថែមថា អ្វីដែលពួកគេនិយាយមកខ្ញុំ គឺខ្ញុំមិនមានគំនិតដែលថា ប៉ាឡេស្ទីន កំពុងនិយាយការពិតអំពីចំនួន មនុស្សត្រូវបានសម្លាប់នោះទេ ។ ប៉ុន្តែទោះបីជាយ៉ាងណាក្តីខ្ញុំប្រាកដថាពិតជាមានជនស្លូតត្រង់ត្រូវបានគេសម្លាប់ ហើយវាជាតម្លៃ នៃការធ្វើសង្រ្គាម។
គួរឲ្យដឹងដែរថា អ៊ីស្រាអែលបានធ្វើការទម្លាក់គ្រាប់បែក ពីលើអាកាសដែលមិនធ្លាប់មាន ពីមុនមកលើតំបន់ហ្គាហ្សា ក្នុងប៉ុន្មាន សប្តាហ៍ថ្មីៗនេះ ក្នុងការសងសឹក ចំពោះការវាយប្រហារ កាលពីថ្ងៃទី៧ខែតុលា លើទឹកដីរបស់ខ្លួន ដោយក្រុមសកម្មប្រយុទ្ធប៉ាឡេស្ទីន ហាម៉ាស ក្នុងអំឡុងពេលដែលមនុស្ស ប្រហែល១៤០០នាក់ ដែលភាគច្រើនជាជនស៊ីវិលត្រូវបានសម្លាប់ នេះបើយោងតាមប្រភពផ្លូវការ របស់អ៊ីស្រាអែល៕
ប្រែសម្រួល៖ស៊ុនលី
