គ៊ែរ៖ អេហ្ស៊ីបបានព្រមាន អំពីហានិភ័យធ្ងន់ធ្ងរ និងផលប៉ះពាល់ផ្នែកមនុស្សធម៌ និងសន្តិសុខ ដែលមិនធ្លាប់មានពីមុនមក ដែលអាចបណ្តាលមកពីការ វាយប្រហារលើដីទ្រង់ទ្រាយធំរបស់អ៊ីស្រាអែល លើតំបន់ហ្គាហ្សាស្ទ្រីប។
នៅក្នុងសេចក្តីថ្លែងការណ៍របស់ក្រសួងការបរទេសអេហ្ស៊ីប បានឲ្យដឹងអេហ្ស៊ីប បានចាត់ទុករដ្ឋាភិបាល អ៊ីស្រាអែល ទទួលខុសត្រូវ ចំពោះការរំលោភលើដំណោះស្រាយ ដែលបានអនុម័ត ដោយមហាសន្និបាត អង្គការសហប្រជាជាតិកាលពីថ្ងៃសុក្រ ដែលអំពាវនាវឱ្យមានបទឈប់ បាញ់មនុស្សធម៌ជាបន្ទាន់ យូរអង្វែង និងនិរន្តរភាព ។
អេហ្ស៊ីប បានសម្តែងការព្រួយបារម្ភថា ប្រតិបត្តិការយោធាជើងគោក អាចបង្កើនចំនួនអ្នកស្លាប់ និងរបួសក្នុងចំណោមជនស៊ីវិល រួមទាំងកុមារ និងស្ត្រីផងដែរ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
ខណៈពេលដែលបញ្ជាក់ថា ប្រតិបត្តិការលើដី គឺជាការបំពានជាក់ស្តែង នៃច្បាប់មនុស្សធម៌អន្តរជាតិ អេហ្ស៊ីបបានបន្តការអំពាវនាវ របស់ខ្លួនលើភាគីអ៊ីស្រាអែល ដើម្បីសម្របសម្រួលនីតិវិធីសម្រាប់ធានាសុវត្ថិភាព ពេញលេញ និងនិរន្តរភាពនៃការផ្តល់ជំនួយមនុស្សធម៌ និងជំនួយទៅកាន់តំបន់ហ្គាហ្សា ។
ប្រភពបានព្រមានថាការខកខាន ក្នុងការដោះស្រាយភ្លាមៗនូវការទាមទារឱ្យមានបទឈប់បាញ់មនុស្សធម៌ និងសម្របសម្រួលការទទួល បានជំនួយទៅកាន់តំបន់ហ្គាហ្សា នឹងនាំទៅរកមហន្តរាយមនុស្សធម៌ ដែលមិនអាចជៀសបាន និងបង្កការគំរាមកំហែង ដល់ស្ថិរភាពក្នុងតំបន់។
អ៊ីស្រាអែល បានបង្កើនការវាយប្រហារ តាមអាកាសរបស់ខ្លួនប្រឆាំង នឹងតំបន់ហ្គាហ្សាស្ទ្រីប ដែលគ្រប់គ្រងដោយក្រុមហាម៉ាស និងបានពង្រីកប្រតិបត្តិការជើងគោក នៅក្នុងតំបន់កាលពីយប់ថ្ងៃសុក្រ ខណៈដែលប្រព័ន្ធផ្សព្វផ្សាយ ក្នុងស្រុកបានរាយការណ៍ថា ពួកសកម្មប្រយុទ្ធប៉ាឡេស្ទីន បានបាញ់រ៉ុក្កែតតម្រង់ ទៅលើរថក្រោះអ៊ីស្រាអែល ដែលដាក់ពង្រាយ នៅតាមព្រំដែន៕
ប្រែសម្រួល ឈូក បូរ៉ា
