បរទេស៖ យោងតាមកងកម្លាំងការពារអ៊ីស្រាអែល (IDF) បានឱ្យដឹងថា អ៊ីស្រាអែលបានសម្លាប់ឥស្សរជនក្រុមហាម៉ាស ដ៏លេចធ្លោម្នាក់ទៀតកាលពីថ្ងៃពុធនៅក្នុងការវាយប្រហារ តាមអាកាសលើកទីពីរ ក្នុងរយៈពេលពីរថ្ងៃ ដែលផ្តោតលើជំរុំជនភៀសខ្លួន Jabalia ដែលមានប្រជាជនច្រើន នៅតំបន់ហ្គាហ្សា។
យោងតាមសារព័ត៌មាន RT ចេញផ្សាយនៅថ្ងៃទី២ ខែវិច្ឆិកា ឆ្នាំ២០២៣ បានឱ្យដឹងថា កងកម្លាំងការពារអ៊ីស្រាអែល បាននិយាយថា យន្តហោះចម្បាំងមួយគ្រឿងបានទម្លាក់គ្រាប់បែក លើបរិវេណក្នុងជំរុំជនភៀសខ្លួន Jabalia “ផ្អែកលើការស៊ើបការណ៍ច្បាស់លាស់” ដោយបានសម្លាប់ មេបញ្ជាការអង្គភាពកាំជ្រួច ប្រឆាំងរថក្រោះ របស់ពួកសកម្មប្រយុទ្ធប៉ាឡេស្ទីន ឈ្មោះ Muhammad A’sar ។ ការវាយប្រហារនេះកើតឡើង បន្ទាប់ពីការវាយប្រហារ នៅជំរុំជាច្រើនម៉ោងមុន ដែលអ៊ីស្រាអែលបាននិយាយថាបានសម្លាប់ Ibrahim Biari ដែលអ៊ីស្រាអែលអះអាងថា ជាតួអង្គសំខាន់ក្នុងការរៀបចំ ការវាយប្រហារថ្ងៃទី ៧ ខែតុលាលើរដ្ឋជ្វីហ្វ។
អ៊ីស្រាអែលបាននិយាយនៅក្នុងសេចក្តីថ្លែងការណ៍មួយថា “ក្រុមហាម៉ាសមានចេតនាសាងសង់ហេដ្ឋារចនាសម្ព័ន្ធភេរវកម្មរបស់ខ្លួននៅក្រោម ជុំវិញ និងនៅក្នុងអគារស៊ីវិល ដោយចេតនាបង្កគ្រោះថ្នាក់ដល់ជនស៊ីវិលនៅតំបន់ ហ្គាហ្សា ” ។ អាជ្ញាធរហ្គាហ្សាមិនទាន់បានបង្ហាញពីតួលេខជនរងគ្រោះដែលទាក់ទងនឹងការវាយប្រហារចុងក្រោយនេះនៅឡើយទេ ប៉ុន្តែលោកវេជ្ជបណ្ឌិត Atef Al Kahlout នាយកមន្ទីរពេទ្យឥណ្ឌូនេស៊ីរបស់ Gaza បានប្រាប់ CNN ថាយ៉ាងហោចណាស់មនុស្ស ៨០ នាក់បានស្លាប់។
មន្ត្រីសុខាភិបាលប៉ាឡេស្ទីនបាននិយាយថា ការទម្លាក់គ្រាប់បែកកាលពីថ្ងៃអង្គារបានសម្លាប់មនុស្សប្រហែល ៥០ នាក់ និងរបួស ១៥០ នាក់ទៀត។ ក្រុមហាម៉ាសបានបដិសេធថា មេដឹកនាំណាមួយរបស់ខ្លួនមិនមានវត្តមាននៅជំរំ Jabalia នោះទេ៕
ប្រែសម្រួលៈ ណៃ តុលា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
