បរទេស៖ប្រធានាធិបតី អ៊ុយក្រែន លោក Vladimir Zelenksy បានអញ្ជើញអតីតប្រធានាធិបតី អាមេរិក លោក Donald Trump មកបំពេញទស្សនកិច្ចក្នុងប្រទេស របស់លោក ដោយសន្យាថានឹងបង្ហាញ ចំពោះឲ្យគណបក្សសាធារណរដ្ឋថា ហេតុអ្វីបានជាលោកនឹង មិនអាចដោះស្រាយជម្លោះ ជាមួយរុស្ស៊ី ក្នុងរយៈពេល ២៤ ម៉ោង។
លោក Zelensky បាននិយាយនៅក្នុងបទសម្ភាសន៍ ជាមួយទូរទស្សន៍ NBC News កាលពីថ្ងៃអាទិត្យថា ៖អតីតប្រធានាធិបតី Trump បាននិយាយថា ក្នុងរយៈពេលប្រហែល២៤ម៉ោង ដែលគាត់អាចគ្រប់គ្រងជម្លោះ ហើយថែមទាំងអាចបញ្ចប់សង្រ្គាម ។
លោក Zelensky បានបន្តថា៖ប្រធានាធិបតី Joe Biden បានមកដល់នៅទីនេះដែរ ហើយគាត់បានយល់អំពីព័ត៌មាន លម្អិតមួយចំនួន ដែលអ្នកអាចយល់បានតែនៅទីនេះ ដូច្នេះខ្ញុំសូមអញ្ជើញប្រធានាធិបតី Trumpមកទីនេះម្តង។
លោកក៏បានបញ្ជាក់បែបនេះទៀតថា ៖ប្រសិនបើគាត់អាចមកទីនេះ ខ្ញុំនឹងត្រូវការពេល២៤នាទីប៉ុណ្ណោះ មិនមែន២៤ម៉ោងឡើយដើម្បីពន្យល់ទៅ លោកប្រធានាធិបតី Trump ថាគាត់មិនអាចគ្រប់គ្រងសង្រ្គាមនេះបានទេ។ លោកមិនអាចនាំមកនូវសន្តិភាពបានឡើយដោយសារតែរុស្សីកំពុងដឹកនាំដោយប្រធានាធិបតីលោក Vladimir Putinនោះ៕
ប្រែសម្រួល៖ស៊ុនលី
