បរទេស៖ រដ្ឋមន្ត្រីការបរទេស រុស្ស៊ីលោក Sergey Lavrov បាននិយាយកាលពីថ្ងៃពុធថា អាជីវកម្មរបស់សហភាព អឺរ៉ុបបានខាតបង់យ៉ាងហោចណាស់ ២៥០ ពាន់លានអឺរ៉ូ (២៦៦,៦ ពាន់លានដុល្លារ) ដោយសារតែការដាក់ ទណ្ឌកម្មដ៏ធំធេង ដែលដាក់លើទីក្រុងម៉ូស្គូ។
យោងតាមសារព័ត៌មាន RT ចេញផ្សាយនៅថ្ងៃទី៨ ខែវិច្ឆិកា ឆ្នាំ២០២៣ បានឱ្យដឹងថា យោងតាមអ្នកការទូត កំពូលរុស្ស៊ីរូបនេះ ទាំងនេះគឺជា “ការប៉ាន់ប្រមាណបែបអភិរក្សខ្លាំង” នៃការខូចខាត ដែលលោកខាងលិច ដែលបានធ្វើបាបលើអាជីវកម្មរបស់ខ្លួនក្នុងរយៈពេលមួយឆ្នាំកន្លះកន្លងមក ដោយដាក់ចេញ នូវទណ្ឌកម្មឯកតោភាគី។
ពាណិជ្ជកម្មរុស្ស៊ី-សហភាពអឺរ៉ុប មានចំនួនសរុប ២០០ពាន់លានដុល្លារ ក្នុងឆ្នាំ២០២២ ហើយត្រូវបានគេរំពឹងថា នឹងធ្លាក់ចុះតិចជាង ១០០ពាន់លានដុល្លារ នៅចុងឆ្នាំ២០២៣, នេះបើយោងតាមក្រសួងការបរទេស។
ការប៉ាន់ប្រមាណរបស់ក្រសួងការ បរទេសរុស្ស៊ីចុងក្រោយបង្ហាញថា ពាណិជ្ជកម្មទៅវិញទៅមករវាងរុស្ស៊ី និងរដ្ឋជាសមាជិកសហភាពអឺរ៉ុប ដែលមានចំនួនសរុប ៤១៧ ពាន់លានដុល្លារក្នុងឆ្នាំ ២០១៣ អាចឈានដល់ ៧០០ ពាន់លានដុល្លារនៅឆ្នាំនេះ បើមិនមានការដាក់ ទណ្ឌកម្មនោះទេ។
ថ្លែងនៅក្នុងកិច្ចប្រជុំទាក់ទងនឹងអ៊ុយក្រែនជាមួយប្រមុខបេសកកម្មការទូតនៅទីក្រុងមូស្គូ លោក Lavrov បាននិយាយថា ខណៈពេលដែលសហភាពអឺរ៉ុបមិនបង្ហាញសញ្ញានៃការផ្លាស់ប្តូរគោលនយោបាយរបស់ខ្លួន រុស្ស៊ីកំពុងបង្កើតយន្តការពាណិជ្ជកម្មឯករាជ្យ។
លោកថា “យើងយល់ យ៉ាងច្បាស់ថា ទណ្ឌកម្មដែលដាក់មកលើពួកយើង នឹងមិនបាត់ទៅវិញ នាពេលអនាគតដ៏ខ្លី ខាងមុខនោះទេ និងសូម្បីតែក្នុងរយៈពេលវែងជាងនេះក៏ដោយ ។ យើងមិនត្រូវការវាទេ មិនមែនដោយសារយើង ជ្រើសរើសភាពឯកោ ឬភាពគ្រប់គ្រាន់ខ្លួនឯងនោះទេ។ លោកខាងលិចបានសម្រេចចិត្តបំផ្លាញសេដ្ឋកិច្ចពិភពលោក ដើម្បីតែបង្រៀនរុស្ស៊ីនូវមេរៀនមួយ» ៕
ប្រែសម្រួលៈ ណៃ តុលា
