ស្តុកខុម៖ ប្រភពពីទីភ្នាក់ងារ Xinhua បានផ្សព្វផ្សាយនៅថ្ងៃទី១៧ ខែវិច្ឆិកា ឆ្នាំ២០២៣ថា ប្រទេសស៊ុយអែត កំពុងរៀបចំផែនការពង្រីក “ដ៏ធំ” នៃការប្រើប្រាស់ថាមពលនុយក្លេអ៊ែរថ្មី ។ រដ្ឋាភិបាលបានឲ្យដឹងនៅទីនេះកាលពីថ្ងៃព្រហស្បតិ៍ ដោយនៅឆ្នាំ២០៤៥ ខ្លួនចង់ឱ្យប្រទេស មានរ៉េអាក់ទ័រ ចំនួន១០ស្មើនឹងម៉ាស៊ីនរ៉េអាក់ទ័រ២ ដែលនឹងដំណើរការរួចហើយនៅឆ្នាំ ២០៣៥ ។
ករណីនេះមានន័យថា “ការរៀបចំរចនាសម្ព័ន្ធឡើងវិញ ជាប្រវត្តិសាស្ត្រនៃគោលនយោបាយ ប្រើប្រាស់ថាមពលរបស់ប្រទេសស៊ុយអែត” លោកស្រីរដ្ឋមន្ត្រីក្រសួងថាមពល ធុរកិច្ច និងឧស្សាហកម្ម Ebba Busch បានលើកឡើង នៅក្នុងសន្និសីទសារព័ត៌មានមួយ ដែលបង្ហាញពីការផ្លាស់ប្តូរគោលនយោបាយ ពី១០០ភាគរយ ដែលអាចកកើតឡើងវិញបានទៅ១០០ភាគរយ ដែលមិនមានថាមពលចេញពីហ្វូស៊ីល ។
លោកស្រី Busch បានបញ្ជាក់ថា “យើងត្រូវតែផលិតអគ្គិសនីទ្វេដងក្នុងរយៈពេល២៥ឆ្នាំ” ។
លោកស្រីបានថ្លែងថា ដើម្បីសម្រេចបាននូវគោលដៅនេះ ការកំណត់លើចំនួនម៉ាស៊ីនរ៉េអាក់ទ័រនុយក្លេអ៊ែរ ត្រូវបានលើក ហើយដំណើរការអនុញ្ញាត សម្រាប់ម៉ាស៊ីនរ៉េអាក់ទ័រថ្មី នឹងត្រូវបានសម្រួល និងបង្កើនល្បឿន ។
លោកស្រី Busch បានបញ្ជាក់ថា រដ្ឋាភិបាលក៏បានសម្រេចចិត្តណែនាំការធានាឥណទានសម្រាប់ការវិនិយោគនៅក្នុងថាមពលនុយក្លេអ៊ែរថ្មីនេះផងដែរ ។
គួររំលឹកថា កាលពីឆ្នាំមុន អគ្គិសនី ១៧០តេរ៉ាវ៉ាត់ម៉ោង (TWh) ត្រូវបានផលិតនៅក្នុងប្រទេសនេះ ដែលក្នុងនោះ ៦៩ភាគរយបានមកពីថាមពល នៃការកកើតឡើងវិញ នេះបើយោងតាមស្ថិតិរបស់ប្រទេសស៊ុយអែត ។
វារីអគ្គិសនីមានចំនួន៤១ភាគរយនៃទិន្នផលសរុប ខណៈនុយក្លេអ៊ែរ មាន២៩ភាគរយ និងខ្យល់មាន១៩ភាគរយ ។
យោងតាមទីភ្នាក់ងារថាមពលស៊ុយអែត បានបញ្ជាក់ថា ការប្រើប្រាស់អគ្គិសនី របស់ប្រទេសនេះ អាចកើនឡើងទ្វេដងដល់ ២៨០TWh ក្នុង១ឆ្នាំនៅឆ្នាំ២០៣៥ និងកើនឡើងបន្ថែមទៀត ដល់៣៧០TWh នៅឆ្នាំ២០៤៥ ៕
ដោយ៖ ម៉ៅ បុប្ផាមករា
