បរទេស៖ អនុប្រធានសភា Knesset របស់ប្រទេសអ៊ីស្រាអែល បានជំរុញឱ្យយោធាអ៊ីស្រាអែល “ដុត” នៅតំបន់ ហ្គាហ្សាស្រ្ទីប និងមិនត្រូវអនុញ្ញាតឱ្យមានការនាំចូលឥន្ធនៈ ណាមួយចូលទៅក្នុងតំបន់ឡោមព័ទ្ធនេះ លុះត្រាតែចំណាប់ខ្មាំង ទាំងអស់ ដែលកាន់កាប់ដោយ ក្រុមហាម៉ាស ត្រូវបានដោះលែង។
យោងតាមសារព័ត៌មាន RT ចេញផ្សាយនៅថ្ងៃទី១៧ ខែវិច្ឆិកា ឆ្នាំ២០២៣ បានឱ្យដឹងថា “ការខ្វល់ខ្វាយទាំងអស់នេះ ថាតើមានអ៊ីនធឺណិតឬអត់នៅហ្គាហ្សា បង្ហាញថាយើងមិនបានរៀនអ្វីសោះ។ យើងជាមនុស្សមានមនុស្សធម៌ពេក» , នេះបើតាមលោក Nissim Vaturi សមាជិកនៃគណបក្ស Likud របស់នាយករដ្ឋមន្ត្រី Benjamin Netanyahu បានសរសេរនៅលើ X (អតីត Twitter) កាលពីថ្ងៃសុក្រ។
លោក Nissim Vaturi បានសរសេរថា “ដុតហ្កាហ្សាឥឡូវនេះ ដុតឱ្យខ្លាំងទៅ! កុំឲ្យសាំងចូល កុំឲ្យទឹកចូលរហូតទាល់តែចំណាប់ខ្មាំងត្រឡប់មកវិញ!»។
ការអត្ថាធិប្បាយរបស់ លោក Vaturi គឺជាសេចក្តីថ្លែងការណ៍ចុងក្រោយបង្អស់ដែលធ្វើឡើងដោយអ្នកនយោបាយអ៊ីស្រាអែល ទាក់ទងនឹងប្រតិបត្តិការដែលកំពុងបន្តនៅក្នុងតំបន់ហ្គាហ្សា។ កាលពីដើមខែនេះ លោក Netanyahu បានផ្អាកការងាររដ្ឋមន្ត្រីបេតិកភណ្ឌ Amihai Eliyahu ពីកិច្ចប្រជុំគណៈរដ្ឋមន្ត្រី បន្ទាប់ពីលោកបានស្នើឱ្យប្រើប្រាស់អាវុធនុយក្លេអ៊ែរប្រឆាំងនឹងក្រុមប៉ាឡេស្ទីន។
ក្រុមហាម៉ាស់បានចាប់ចំណាប់ខ្មាំងជាង ២០០ នាក់ក្នុងអំឡុងពេលការវាយប្រហារថ្ងៃទី ៧ ខែតុលារបស់ខ្លួនលើអ៊ីស្រាអែលដែលបានសម្លាប់មនុស្សប្រហែល ១.២០០ នាក់ដែលភាគច្រើនជាជនស៊ីវិល។ អ៊ីស្រាអែលបានឆ្លើយតបនឹងការលុកលុយដោយបើកយុទ្ធនាការទម្លាក់គ្រាប់បែកនិងការលុកលុយលើទឹកដីហ្គាហ្សា៕
ប្រែសម្រួលៈ ណៃ តុលា
