បរទេស ៖ មន្ទីរប៉ង់តាហ្គោនកាលពីថ្ងៃចន្ទ បានអះអាងថា រដ្ឋមន្ត្រីការពារជាតិអាមេរិក លោក Lloyd Austin បានធ្វើដំណើរទៅដល់ទីក្រុងគៀវស្ងាត់ៗ ដោយមិនប្រកាសជាមុនឡើយ ។
យោងតាមការចេញផ្សាយរបស់ RT សេចក្តីថ្លែងការណ៍ បាននិយាយថា ដំណើរទស្សនកិច្ចលើកនេះ លោកបានជួបប្រជុំ ជាមួយថ្នាក់ដឹកនាំអ៊ុយក្រែន ដើម្បីផ្តល់ការធានាឡើងវិញអំពីការប្តេជ្ញាចិត្ត របស់ទីក្រុងវ៉ាស៊ីនតោន ក្នុងការផ្តល់ជំនួយយោធា ដល់អ៊ុយក្រែន ។ ទោះយ៉ាងណាក៏ដោយ មិនមានកញ្ចប់ជំនួយថ្មី ជាក់លាក់ណាមួយសម្រាប់អ៊ុយក្រែន ត្រូវបានប្រកាសនោះទេ។
លោក Austin បានសរសេរនៅក្នុងការបង្ហោះលើគេហទំព័រ Xខណៈដែលលោកបានចែករំលែករូបថតខ្លួនឯង ដែលត្រូវបានស្វាគមន៍ ដោយមន្ត្រីអ៊ុយក្រែននៅផ្លូវរថភ្លើងមួយថា៖ ខ្ញុំមកទីនេះថ្ងៃនេះដើម្បីថ្លែងសារដ៏សំខាន់ សហរដ្ឋអាមេរិកនឹងបន្តឈរ ជាមួយអ៊ុយក្រែន ចំពោះមុខជម្លោះជាមួយនឹងរុស្សី។
ក្រោយមក លោកក៏បាននិយាយដែរថា លោកបានជួបពិភាក្សា ជាមួយប្រធានាធិបតីអ៊ុយក្រែន លោក Vladimir Zelensky ហើយបានសន្យាជាថ្មីម្តងទៀតថា៖ការគាំទ្រយ៉ាងខ្ជាប់ខ្ជួន របស់សហរដ្ឋអាមេរិកសម្រាប់អ៊ុយក្រែន ។ ទីក្រុងវ៉ាស៊ីនតោន និងសម្ព័ន្ធមិត្តនឹងនៅតែបន្តផ្តល់តម្រូវ ការសមរភូមិបន្ទាន់ និងតម្រូវការការពាររយៈពេលវែង របស់កងកម្លាំងអ៊ុយក្រែន ៕
ប្រែសម្រួល៖ស៊ុនលី
