ម៉ូស្គូ៖ ជាមួយនឹងប្រទេសជប៉ុន សហរដ្ឋអាមេរិក និងកូរ៉េខាងត្បូង បានថ្កោលទោសការផ្តល់ឧបករណ៍យោធា និងអាវុធដោយកូរ៉េខាងជើង ទៅឱ្យរុស្ស៊ី សម្រាប់ប្រើប្រាស់ក្នុងសង្គ្រាមនៅអ៊ុយក្រែន ប្រទេសទាំង ៣កំពុងតាមដានយ៉ាងដិតដល់នូវអ្វី ដែលទីក្រុងម៉ូស្គូ នឹងផ្តល់ឱ្យ ឬប្រហែលជាផ្តល់ឱ្យទីក្រុងព្យុងយ៉ាង ជាថ្នូរនឹងការផ្ដល់ឲ្យពីទីក្រុងព្យុងយ៉ាង។
មានការព្រួយបារម្ភ អំពីការផ្ទេរសក្តានុពល ដោយរុស្ស៊ីទៅកាន់កូរ៉េខាងជើង នៃបច្ចេកវិទ្យានុយក្លេអ៊ែរ និងមីស៊ីលផ្លោង ក្នុងការស្វែងរករបស់ទីក្រុងព្យុងយ៉ាង ឧទាហរណ៍ ផ្កាយរណបចារកម្មយោធា និងនាវាមុជទឹកដើរដោយថាមពលនុយក្លេអ៊ែរ។
ប្រសិនបើកិច្ចព្រមព្រៀងបែបនេះកើតឡើង វាអាចបំផ្លាញសន្តិសុខក្នុងតំបន់ និងរបបមិនរីកសាយភាយអន្តរជាតិ ដែលជាការអភិវឌ្ឍន៍ ដែលនឹងប៉ះពាល់ដល់ប្រទេសចិន ដែលជាអ្នកផ្តល់ផលប្រយោជន៍ផ្នែកសេដ្ឋកិច្ច និងការទូតដ៏សំខាន់របស់កូរ៉េខាងជើងផងដែរ។
អ្នកជំនាញកិច្ចការរុស្ស៊ីមួយចំនួនជឿថា ការផ្តល់បច្ចេកវិទ្យាដ៏ទំនើប និងរសើបបែបនេះមិនទំនងនោះទេ ហើយជំនួយរបស់រុស្ស៊ី ត្រូវបានកំណត់ចំពោះថាមពល និងអាហារ ហើយប្រហែលជាមានអាវុធចុះកាលបរិច្ឆេទ។
លោក James Brown សាស្ត្រាចារ្យវិទ្យាសាស្ត្រនយោបាយនៅសាកលវិទ្យាល័យ Temple University Japan Campus ក្នុងទីក្រុងតូក្យូបានឲ្យដឹងថា “កូរ៉េខាងជើង ចង់បានបច្ចេកវិទ្យាផ្កាយរណប បច្ចេកវិទ្យាមីស៊ីល និងបច្ចេកវិទ្យានាវាមុជទឹក ដែលប្រសើរឡើង ហើយរុស្ស៊ីប្រហែលជាចង់បង្ហាញពីឆន្ទៈក្នុងការផ្តល់នូវបច្ចេកវិទ្យាទាំងនោះ ប៉ុន្តែតាមពិត ពួកគេនឹងស្ទាក់ស្ទើរក្នុងការផ្ដល់ឲ្យ”។
ទីក្រុងព្យុងយ៉ាង ត្រូវបានគេជឿថាកំពុងរៀបចំបាញ់បង្ហោះផ្កាយរណបឈ្លបយកការណ៍យោធា ដែលអាចទទួលបានជំនួយ និងដំបូន្មានពីទីក្រុងមូស្គូ បន្ទាប់ពីជំនួបរវាងមេដឹកនាំកូរ៉េខាងជើងលោក គីម ជុងអ៊ុន និងប្រធានាធិបតីរុស្ស៊ី លោក វ្ល៉ាឌីមៀ ពូទីន ក្នុងខែកញ្ញា នៅតំបន់ចុងបូព៌ារបស់រុស្ស៊ី៕
ប្រែសម្រួល ឈូក បូរ៉ា
