បរទេស៖ រុស្ស៊ី បានត្រៀមខ្លួនរួចជាស្រេចដើម្បីបញ្ឈប់ការប្រយុទ្ធ ប្រសិនបើអ៊ុយក្រែនយល់ព្រមរក្សាអព្យាក្រឹត ប៉ុន្តែលោកខាងលិចបានណែនាំឲ្យទីក្រុងកៀវបន្តដំណើរទៅមុខទៀត, នេះបើតាមប្រមុខបក្សសភារបស់ប្រធានាធិបតីអ៊ុយក្រែន និងជាប្រធានអ្នកចរចានៅឯកិច្ចចរចាសន្តិភាពនៅទីក្រុងអ៊ីស្តង់ប៊ុល លោក David Arakhamia បានលើកឡើងកាលពីថ្ងៃសុក្រ។
យោងតាមសារព័ត៌មាន RT ចេញផ្សាយនៅថ្ងៃទី២៤ ខែវិច្ឆិកា ឆ្នាំ២០២៣ បានឱ្យដឹងថា លោក Arakhamia ដែលជាប្រធានក្រុមសភា “គាំទ្រនយោបាយអឺរ៉ុប” បានប្រាប់ទូរទស្សន៍ប៉ុស្តិ៍ 1+1 ថា រដ្ឋាភិបាលទីក្រុងម៉ូស្គូបានផ្តល់កិច្ចព្រមព្រៀងសន្តិភាពដល់ទីក្រុងគៀវកាលពីខែមីនាឆ្នាំ ២០២២ ប៉ុន្តែភាគីអ៊ុយក្រែនមិនជឿទុកចិត្តលើប្រទេសរុស្ស៊ីទេ។
លោក Arakhamia បាននិយាយថា “គោលដៅរបស់រុស្ស៊ីគឺដាក់សម្ពាធមកលើយើង ដើម្បីឲ្យយើងមានអព្យាក្រឹតភាព។ នេះជារឿងសំខាន់សម្រាប់ពួកគេ៖ ពួកគេបានត្រៀមខ្លួនរួចជាស្រេចដើម្បីបញ្ចប់សង្រ្គាម ប្រសិនបើយើងទទួលយកអព្យាក្រឹតភាព ដូចហ្វាំងឡង់ធ្លាប់ធ្វើ ហើយយើងនឹងធ្វើការប្ដេជ្ញាចិត្តថាយើងនឹងមិនចូលរួមជាមួយណាតូ។ នេះជារឿងសំខាន់»។
លោក Arakhamia បានពន្យល់ប្រាប់ 1+1ថា ទោះជាយ៉ាងណាក៏ដោយ ការយល់ព្រមលើអព្យាក្រឹតភាព និងការបោះបង់សមាជិកភាពណាតូ តម្រូវឲ្យមានការផ្លាស់ប្តូររដ្ឋធម្មនុញ្ញរបស់អ៊ុយក្រែន។ “ទីពីរ គ្មានការជឿជាក់លើជនជាតិរុស្ស៊ីថាពួកគេនឹងធ្វើបែបនេះនោះទេ។ នេះអាចត្រូវបានធ្វើដោយការធានាសុវត្ថិភាពប៉ុណ្ណោះ” ៕ ប្រែសម្រួលៈ ណៃ តុលា
