បរទេស ៖ យោធាចិននៅថ្ងៃច័ន្ទបាននិយាយថា កប៉ាល់កងទ័ពជើងទឹក អាមេរិកមួយគ្រឿង បានចូលដែនទឹកដោយខុសច្បាប់នៅ Second Thomas Shoal ដែលជាដែនទឹកសមុទ្រចិន ខាងត្បូង ដែលមានជម្លោះដែលថ្មីៗនេះ បានឃើញការប្រឈមមុខដាក់គ្នា ក្នុងដែនសមុទ្រជាច្រើន។
យោងតាមសារព័ត៌មាន VOA ចេញផ្សាយនៅថ្ងៃទី៤ ខែធ្នូ ឆ្នាំ២០២៣ បានឱ្យដឹងថា អ្នកនាំពាក្យសម្រាប់ប្រតិបត្តិការ Southern Theater របស់ប្រទេសចិនបាននិយាយក្នុងសេចក្តីថ្លែងការណ៍មួយថា «អាមេរិកបានធ្វើឲ្យខូចខាតយ៉ាងធ្ងន់ធ្ងរដល់សន្តិភាព និងស្ថិរភាពក្នុងតំបន់» ដោយបន្ថែមថា អាមេរិកបានរំខានសមុទ្រចិនខាងត្បូង និងរំលោភលើអធិបតេយ្យភាពរបស់ចិន។
ប្រទេសចិនកំពុងមានជម្លោះ ជាមួយប្រទេសជិតខាងមួយចំនួន ជុំវិញការទាមទារដែនទឹក យ៉ាងទូលំទូលាយក្នុងសមុទ្រចិនខាងត្បូង។
កងទ័ពជើងទឹកសហរដ្ឋអាមេរិក បាននិយាយថា នាវា USS Gabrielle Giffords ដែលជានាវាចម្បាំងថ្នាក់ Independence-class បានធ្វើប្រតិបត្តិការជាប្រចាំ នៅក្នុងដែនទឹកអន្តរជាតិក្នុងសមុទ្រចិនខាងត្បូង ស្របតាមច្បាប់អន្តរជាតិ។
កងនាវាចរអាមេរិកបាននិយាយនៅក្នុងសេចក្តីថ្លែងការណ៍មួយថា “ជារៀងរាល់ថ្ងៃ កងនាវាចរទី ៧ របស់សហរដ្ឋអាមេរិក ប្រតិបត្តិការនៅក្នុង សមុទ្រចិនខាងត្បូង ដូចដែលពួកគេមានអស់ជាច្រើនទសវត្សរ៍មកហើយ” ។ “ប្រតិបត្តិការទាំងនេះ បង្ហាញឱ្យឃើញយើងប្តេជ្ញា រក្សាតំបន់ឥណ្ឌូប៉ាស៊ីហ្វិកសេរី និងបើកចំហ”។
ក្នុងរយៈពេលប៉ុន្មានខែថ្មីៗនេះ ចិនបានប្រឆាំងជាច្រើនដងជាមួយកប៉ាល់ហ្វីលីពីន និងបានតវ៉ាអំពីនាវាអាមេរិកដែលដើរល្បាតតំបន់ជម្លោះ៕
ប្រែសម្រួលៈ ណៃ តុលា
