តូក្យូ៖ ការសម្របសម្រួលនាពេលថ្មីៗនេះរបស់ចិន ក្នុងកិច្ចពិភាក្សារវាងរបបយោធា ដែលកំពុងកាន់អំណាចរបស់ប្រទេសមីយ៉ាន់ម៉ា និងក្រុមឧទ្ទាមជនជាតិភាគតិចចំនួន៣ នៅក្នុងប្រទេសនេះ បានបង្ហាញពីអវត្តមាន នៃការដឹកនាំរបស់ប្រទេសជប៉ុន ក្នុងការដោះស្រាយវិបត្តិដ៏យូរនៅទីនោះ ដែលអ្នកសង្កេតការណ៍ជឿថា បានឈានដល់ចំណុចរបត់មួយចាប់តាំងពីរដ្ឋប្រហារឆ្នាំ២០២១ ។
ការសម្រុះសម្រួលដែលទីក្រុងប៉េកាំង បានឲ្យដឹងថាបាននាំមកនូវបទឈប់បាញ់បណ្តោះអាសន្នរវាងភាគីទាំងពីរនៅភាគឦសានរបស់ប្រទេសនេះបានចោទជាសំណួរអំពីគោលនយោបាយមីយ៉ាន់ម៉ារបស់ប្រទេសជប៉ុន ដែលដោះស្រាយជាចម្បងជាមួយរបបយោធា ដោយមិនលើកកម្ពស់ទំនាក់ទំនងជាមួយរដ្ឋាភិបាលរួបរួមជាតិ ភាពជាអ្នកដឹកនាំស៊ីវិលស្រមោល និងសម្ព័ន្ធមិត្តជនជាតិភាគតិចរបស់ខ្លួន។
ព័ត៌មានលម្អិតនៃកិច្ចព្រមព្រៀងមួយ ដូចជារយៈពេលដែលបទឈប់បាញ់នឹងមានរយៈពេល និងផលប៉ះពាល់របស់វាសម្រាប់ជម្លោះទាំងមូល នៅតែត្រូវបានគេមើលឃើញ។ ប្រទេសចិន បានធ្វើអន្តរាគមន៍នៅដំណាក់កាលដ៏សំខាន់មួយ ស្របពេលជាមួយនឹងភាពជោគជ័យនៃការវាយលុកសម្របសម្រួលដោយក្រុមទាំង៣ កាលពីចុងខែតុលា ដែលបានពង្រឹងកម្លាំងគាំទ្រលទ្ធិប្រជាធិបតេយ្យទូទាំងប្រទេស ដោយបង្ហាញពីបញ្ហាប្រឈមដ៏សំខាន់បំផុត ចំពោះរបបយោធាចាប់តាំងពីរដ្ឋប្រហារ។
លោកស្រី Maiko Ichihara សាស្ត្រាចារ្យផ្នែកទំនាក់ទំនងអន្តរជាតិនៅសាកលវិទ្យាល័យ Hitotsubashi ដោយជំរុញឱ្យទីក្រុងតូក្យូចូលរួមជាមួយ NUG និងផ្សេងទៀតថា “វានឹងមិនបម្រើផលប្រយោជន៍របស់ប្រទេសជប៉ុននោះទេ ប្រសិនបើរដ្ឋាភិបាលដោះស្រាយជាមួយរបបយោធា ពីព្រោះប្រជាជនមីយ៉ាន់ម៉ា ភាគច្រើនប្រឆាំងនឹងការគ្រប់គ្រងរបស់យោធា” ។
លោកស្រីបានលើកឡើងថា “ក្នុងនាមជាប្រទេសដែលតស៊ូមតិលើនីតិរដ្ឋ និងការគោរពសិទ្ធិមនុស្ស និងតម្លៃសកលផ្សេងទៀត ក្រោមចក្ខុវិស័យនៃឥណ្ឌូប៉ាស៊ីហ្វិកសេរី និងបើកចំហ ខ្ញុំចង់ឱ្យប្រទេសជប៉ុន ធ្វើទំនាក់ទំនងការទូតកាន់តែសកម្មចំពោះមីយ៉ាន់ម៉ា ដែលជាប្រទេសរួមនៅអាស៊ី”៕ ប្រែសម្រួល ឈូក បូរ៉ា
