នៅឆ្នាំក្រោយ វៀតណាម មានបំណងនាំចេញ ផលនេសាទរបស់ខ្លួន គិតជាទឹកប្រាក់ ប្រមាណ៩,៥ពាន់លានដុល្លារ

ហាណូយ៖ ប្រភពពីទីភ្នាក់ងារ Xinhua បានផ្សព្វផ្សាយនៅថ្ងៃទី២២ ខែធ្នូ ឆ្នាំ២០២៣ថា យោងតាមសារព័ត៌មាន Vietnam News បានរាយការណ៍នៅថ្ងៃសុក្រ ដោយបានដកស្រង់សម្តី របស់នាយកដ្ឋានជលផលវៀតណាម ថា ឧស្សាហកម្មនេសាទ របស់ប្រទេសវៀតណាម មានបំណងទទួលបាន ប្រាក់ចំណូល ពីការនាំចេញ ចំនួន៩,៥ពាន់លានដុល្លារសហរដ្ឋអាមេរិក នៅក្នុងងឆ្នាំ២០២៤លើតម្រូវការប្រើប្រាស់សកលទាប ។

យោងតាមសេចក្តីរាយការណ៍ បានឲ្យដឹងថា នៅឆ្នាំ២០២៤ វៀតណាម មានគោលដៅប្រមូលទិន្នផលនេសាទ សរុបប្រមាណ៩,២២លានតោន ស្មើនឹងឆ្នាំនេះដែរ ក្នុងនោះនេសាទបាន៣,៨៦១លានតោន និងវារីវប្បកម្មបានចំនួន៥,៤០៨លានតោន ។ ផលិតផល ជលផលសំខាន់ៗ ក៏មានគោលដៅខ្ពស់លើការនាំចេញផងដែរ ។ ឧទាហរណ៍ បង្គាកំណត់តម្លៃនាំចេញ៣,៤៥ពាន់លានដុល្លារ ខណៈត្រីត្រាវចំនួន១,៩ពាន់លានដុល្លារ និងត្រីធូណាចំនួន៩០០លានដុល្លារ ។

លោក Tran Dinh Luan ប្រធាននាយកដ្ឋានជលផល បានលើកឡើងថា ឧស្សាហកម្មនេសាទរបស់ប្រទេសវៀតណាម បានបន្តប្រឈមមុខនឹងបញ្ហានានា រួមទាំងការថយចុះនៃធនធានអាហារសមុទ្រ ការព្រមានកាតលឿងរបស់គណៈកម្មការអឺរ៉ុប និងតម្រូវការទាបនៅក្នុងទីផ្សារនាំចេញសំខាន់ៗផងដែរ ។

យោងតាមសមាគមអ្នកនាំចេញ និងផលិតអាហារសមុទ្រវៀតណាម បានឲ្យដឹងថា ប្រាក់ចំណូលនៃការនាំចេញជលផលរបស់ប្រទេសវៀតណាមឈានដល់៨,២៧ពាន់លានដុល្លារក្នុងរយៈពេល១១ខែដំបូងនៃឆ្នាំនេះ ដោយបានថយចុះ១៩ភាគរយធៀបពីមួយឆ្នាំទៅមួយឆ្នាំ ៕

ដោយ៖ ម៉ៅ បុប្ផាមករា