ប្រទេសស៊ែប៊ី អរគុណរុស្ស៊ី ដែលផ្តល់ព័ត៌មានសម្ងាត់ អំពីផែនការធ្វើបដិវត្តន៍ពណ៌ ដោយក្រុមប្រឆាំង ចោទបក្សកាន់អំណាចថា លួចសន្លឹកឆ្នោត

បរទេស ៖ នាយករដ្ឋមន្ត្រីស៊ែប៊ីលោកស្រី Ana Brnabiс បានសម្តែងការដឹងគុណ ចំពោះសេវាកម្មសន្តិសុខរុស្ស៊ី ដែលបានជូនដំណឹង ដល់រដ្ឋាភិបាលទីក្រុងបែលក្រាដ អំពីផែនការ នៃការធ្វើកុបកម្មនៅក្នុងរដ្ឋធានី បែលក្រាដ។

យោងតាមសារព័ត៌មាន RT ចេញផ្សាយនៅថ្ងៃទី២៥ ខែធ្នូ ឆ្នាំ២០២៣ បានឱ្យដឹងថា ក្រុមបាតុករគាំទ្រ លោកខាងលិចបានប៉ុនប៉ងទម្លុះចូល ទៅក្នុងអគាររដ្ឋាភិបាល ក្នុងទីក្រុង បែលក្រាដ កាលពីល្ងាចថ្ងៃអាទិត្យ នៅក្នុងអ្វី ដែលប្រធានាធិបតីស៊ែប៊ី លោក Aleksandar Vucic បានហៅថា ជាការប៉ុនប៉ងធ្វើបដិវត្តន៍ពណ៌ ។ ខណៈពេលដែលលោក Vucic ដំបូងបានថ្លែងអំណរគុណចំពោះ “សេវាកម្មបរទេស” ដែលមិនបញ្ចេញឈ្មោះ សម្រាប់ការអនុញ្ញាតឱ្យសេវាកម្មសន្តិសុខរបស់លោក “ដឹងច្បាស់ពីអ្វី ដែលប្រព្រឹត្ដបទឧក្រិដ្ឋកំពុងរៀបចំ” ហើយដែលក្រោយមក លោកស្រី Brnabiс ក្រោយមកបានបង្ហើបថា ទីក្រុង មូស្គូ ជាអ្នកប្រាប់ទីក្រុង បែលក្រាដ អំពីផែនការនេះ។

លោកស្រី Brnabic នាយករដ្ឋមន្ត្រីស៊ែប៊ី បានប្រាប់ទូរទស្សន៍ TV Pink កាលពីយប់ថ្ងៃអាទិត្យថា “ខ្ញុំមានអារម្មណ៍ថាវាមានសារៈសំខាន់ ជាពិសេសនៅយប់នេះ ដើម្បីក្រោកឈរឡើង សម្រាប់ប្រទេសស៊ែប៊ី និងអរគុណដល់សេវាកម្មសន្តិសុខរុស្ស៊ីដែលមានព័ត៌មាននោះ និងអ្នកដែលចែករំលែកវាជាមួយយើង” ។

សូមជម្រាបថា ការតវ៉ាប្រឆាំងរដ្ឋាភិបាលបានផ្ទុះឡើងនៅក្នុងប្រទេសស៊ែប៊ីកាលពីថ្ងៃចន្ទ ដោយក្រុមប្រឆាំងបានចោទប្រកាន់គណបក្សរីកចម្រើនស៊ែប៊ី (SNS) ដែលកំពុងកាន់អំណាចពីបទ “លួចសន្លឹកឆ្នោត” ក្នុងអំឡុងពេលការបោះឆ្នោតសភា កាលពីសប្តាហ៍មុន ដែលក្នុងនោះគណបក្សនេះ បានផ្តួលក្រុមចម្រុះដែលគាំទ្រសហភាពអឺរ៉ុបស៊ែប៊ីប្រឆាំងនឹងអំពើហិង្សា (SPN) ៕
ប្រែសម្រួលៈ ណៃ តុលា