បរទេស ៖ ភ្នាក់ងារសហព័ន្ធ របស់សហរដ្ឋអាមេរិកបានចាប់ខ្លួនបុរសរដ្ឋកាលីហ្វ័រញ៉ាម្នាក់ កាលពីថ្ងៃសុក្រពីបទគំរាមកំហែងបំផ្ទុះ “គ្រាប់បែកផ្ទុកវិទ្យុសកម្ម” នៅការិយាល័យទីស្នាក់ការ ទីភ្នាក់ងារ FBI ក្នុងទីក្រុង Los Angeles ។ នៅក្នុងសំបុត្រជាបន្តបន្ទាប់ ទៅកាន់ទីភ្នាក់ងារនេះ បុរសសង្ស័យនោះ បានប្រៀបធៀបខ្លួនឯង ទៅនឹង ‘Unabomber’ ជាជនដ៏ល្បីឈ្មោះ និងជាភេរវករអាមេរិក គឺ Ted Kaczynski ។
យោងតាមសារព័ត៌មាន RT ចេញផ្សាយនៅថ្ងៃទី២៤ ខែធ្នូ ឆ្នាំ២០២៣ បានឱ្យដឹងថា ក្រសួងយុត្តិធម៌អាមេរិក បានប្រកាសនៅក្នុងសេចក្តីប្រកាស ព័ត៌មានមួយថា លោក Mark William Anten អាយុ ៥២ ឆ្នាំ ត្រូវបានចាប់ខ្លួននៅផ្ទះរបស់គាត់ ហើយត្រូវបានចោទប្រកាន់ ពីបទគំរាមកំហែង ដោយការទំនាក់ទំនងអន្តររដ្ឋ ដែលជាបទល្មើសឧក្រិដ្ឋ ដែលអនុវត្តការផ្តន្ទាទោសអតិបរមា៥ឆ្នាំ នៅក្នុងពន្ធនាគារសហព័ន្ធ។
សេចក្តីប្រកាសព័ត៌មានបានអះអាងថា ចាប់ពីខែកក្កដា លោក Anten “បានបញ្ជូនការទំនាក់ទំនងគំរាម កំហែងជាច្រើនទៅ FBI”។ បន្ទាប់ពីសន្មត់ប្រាប់ភ្នាក់ងារថា គាត់ត្រូវបានគេបោះឆ្នោតភាគច្រើននៅវិទ្យាល័យ ដើម្បីក្លាយជា ‘Unabomber’ បន្ទាប់, គាត់បានចោទប្រកាន់ថា បានផ្ញើអ៊ីមែលទៅពួកគេក្នុងខែវិច្ឆិកា ដោយបញ្ជាក់ថាគាត់កំពុងធ្វើការលើ “ការប្រកាសជាក់ស្តែង” ។
FBI បាននិយាយថា ភ្នាក់ងាររបស់ខ្លួនបានប្រាប់ Anten ឱ្យឈប់ទាក់ទងពួកគេ ប៉ុន្តែគាត់នៅតែបន្ត។ នៅក្នុងសារជាបន្តបន្ទាប់នៅថ្ងៃទី៥ ខែធ្នូ លោក Anten ត្រូវបានគេចោទប្រកាន់ថា បានគំរាម “បំផ្ទុះគ្រាប់បែក ” ការិយាល័យ FBI នៅទីក្រុង Los Angeles ដោយភ្ជាប់ជាមួយរូបភាព ដែលបង្ហាញពីលទ្ធផល នៃការស្វែងរកតាមអ៊ីនធឺណិត Google សម្រាប់ “របៀបបង្កើតគ្រាប់បែកវិទ្យុសកម្ម”៕
ប្រែសម្រួលៈ ណៃ តុលា
