ដាម៉ាស់៖ ទូរទស្សន៍រដ្ឋស៊ីរី បានរាយការណ៍ថា ការវាយប្រហារដោយមីស៊ីលថ្មី របស់អ៊ីស្រាអែលបានកំណត់ គោលដៅជាយក្រុង នៃរដ្ឋធានីដាម៉ាស់ របស់ប្រទេសស៊ីរី កាលពីយប់ថ្ងៃព្រហស្បតិ៍ ដោយបង្កឱ្យមានការឆ្លើយតប ពីប្រព័ន្ធការពារដែនអាកាសស៊ីរី ។
កងទ័ពស៊ីរីបានឲ្យដឹងនៅក្នុងសេចក្តីថ្លែងការណ៍មួយថា “សត្រូវរបស់អ៊ីស្រាអែល” បានធ្វើការវាយប្រហារតាមអាកាសពីទិសដៅនៃតំបន់ Golan Heights ស៊ីរីដែលកាន់កាប់ដោយកំណត់ គោលដៅមួយចំនួននៅ ក្នុងតំបន់ភាគខាងត្បូង ដោយមិនបានបញ្ជាក់លម្អិត អំពីទីតាំងគោលដៅនោះទេ។
ប្រភពបានបន្ថែមថា កងកម្លាំងការពារដែន អាកាសស៊ីរីបានស្ទាក់ចាប់ពួកគេភាគច្រើន ដោយការបាត់បង់មានកំណត់ចំពោះការខូចខាតសម្ភារៈ នេះបើយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ។
ការវាយប្រហារលើកមុនរបស់អ៊ីស្រាអែល ក្នុងប្រទេសស៊ីរី តាមសេចក្តីរាយការណ៍បានកំណត់គោលដៅលើទីតាំងយោធា ដែលសង្ស័យថាមានកងជីវពល គាំទ្រដោយអ៊ីរ៉ង់ ក្បួនរថយន្ត និងកន្លែងផ្ទុកអាវុធដែលត្រូវបានចោទប្រកាន់ នេះបើយោងតាមក្រុមអ្នក ឃ្លាំមើលសិទ្ធិមនុស្សស៊ីរី។
គួរកត់សម្គាល់ថានាពេលថ្មីៗនេះ អ៊ីស្រាអែល បានបង្កើនការវាយប្រហាររបស់ខ្លួនលើគោលដៅស៊ីរី ស្របពេលជាមួយនឹងយុទ្ធនាការ យោធារបស់ខ្លួននៅតំបន់ហ្គាហ្សាស្ទ្រីប។
ស៊ីរីបានហក់ចូលក្នុងសង្រ្គាមជាង១២ឆ្នាំ ដោយមានកម្លាំងរដ្ឋាភិបាលរបស់លោកប្រធានាធិបតី Bashar al-Assad គាំទ្រដោយរុស្ស៊ី និងអ៊ីរ៉ង់ កំពុងប្រយុទ្ធប្រឆាំងនឹងក្រុមប្រឆាំងផ្សេងៗ៕
ប្រែសម្រួល ឈូក បូរ៉ា
