យូអិន៖ អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសយ៉ាងខ្លាំង ចំពោះការវាយប្រហារលើពិធី រំលឹកវិញ្ញាណក្ខន្ធក្នុងប្រទេសអ៊ីរ៉ង់ ដែលបានសម្លាប់មនុស្សជិត ១០០នាក់ ។
លោក Florencia Soto Nino អ្នកនាំពាក្យរងរបស់លោក Guterres បានឲ្យដឹងថា “អគ្គលេខាធិការអំពាវនាវឲ្យអ្នក ដែលទទួលខុសត្រូវទទួលខុសត្រូវ លោកអគ្គលេខាធិការ សូមចូលរួមរំលែកទុក្ខយ៉ាងក្រៀមក្រំ ចំពោះក្រុមគ្រួសារនៃសព និងប្រជាជន និងរដ្ឋាភិបាលនៃសាធារណរដ្ឋឥស្លាមអ៊ីរ៉ង់ ហើយគាត់សូមជូនពរឱ្យ អ្នករបួសឆាប់ជាសះស្បើយ”។
ប្រព័ន្ធផ្សព្វផ្សាយក្នុងស្រុកបានរាយការណ៍ថា ការផ្ទុះពីរនៅជិតកន្លែងបញ្ចុះសព របស់ឧត្តមសេនីយអ៊ីរ៉ង់លោក Qassem Soleimani បានសម្លាប់មនុស្សយ៉ាងហោចណាស់ ៩៥នាក់ និងរបួសជាង ២១០នាក់ទៀតកាលពីថ្ងៃពុធ។
ការបំផ្ទុះបានកើតឡើងនៅពេល ដែលមនុស្សជាច្រើនបានប្រមូលផ្តុំគ្នា នៅទីបញ្ចុះសពក្នុងទីក្រុងខើមេន ភាគអាគ្នេយ៍នៃប្រទេសអ៊ីរ៉ង់ ដើម្បីប្រារព្ធខួបលើកទីបួននៃការស្លាប់របស់លោក Soleimani នៅក្នុងការវាយប្រហារ ដោយយន្តហោះដ្រូនរបស់សហរដ្ឋអាមេរិក ។
យោងតាមទីភ្នាក់ងារព័ត៌មានផ្លូវការ IRNA បានឱ្យដឹងថា ការបំផ្ទុះលើកទីមួយមានចម្ងាយប្រហែល ៧០០ ម៉ែត្រពីផ្នូររបស់លោក Soleimani និងទីពីរមានចម្ងាយមួយគីឡូម៉ែត្រ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
លោក Rahman Jalali អភិបាលរងខេត្តខើមេន ទទួលបន្ទុកកិច្ចការនយោបាយ និងសន្តិសុខ បានឲ្យដឹងថា ការបំផ្ទុះនេះធ្វើឡើងដោយក្រុម “ភេរវករ” នេះបើយោងតាមការចុះផ្សាយ របស់សារព័ត៌មាន IRNA ។
ជាមួយគ្នានេះ បណ្តាញព័ត៌មានសាធារណៈរដ្ឋអ៊ីស្លាមអ៊ីរ៉ង់ បានឲ្យដឹងថា មូលហេតុនៃការបំផ្ទុះនេះ កំពុងស្ថិតក្រោមការស៊ើបអង្កេតនៅឡើយ ហើយក្រុមជួយសង្គ្រោះ កំពុងស្ថិតនៅកន្លែងកើតហេតុ។ ប្រភពបានបន្ថែមថា ភាគច្រើននៃការរងរបួស គឺបណ្តាលមកពីការកកកុញ និងការភ័យស្លន់ស្លោ។
រដ្ឋាភិបាលអ៊ីរ៉ង់ បានប្រកាសថា ថ្ងៃព្រហស្បតិ៍នេះជាថ្ងៃកាន់ទុក្ខជាតិ។ លោក Soleimani ដែលជាមេបញ្ជាការយោធាដ៏ មានឥទ្ធិពលបំផុតមួយរូបក្នុងប្រទេសអ៊ីរ៉ង់ ត្រូវបានសម្លាប់កាលពីថ្ងៃទី៣ ខែមករា ឆ្នាំ២០២០ នៅជិតអាកាសយានដ្ឋានអន្តរជាតិ របស់ទីក្រុងបាកដាដ ក្នុងការវាយប្រហារដោយយន្តហោះដ្រូន ដែលបញ្ជាដោយសហរដ្ឋអាមេរិកនៅពេលនោះ ក្រោមការដឹកនាំរបស់ប្រធានាធិបតីអាមេរិកលោក ដូណាល់ ត្រាំ។
លោកត្រូវបានគេបញ្ចុះ នៅស្រុកកំណើតរបស់លោក នៅ ខើមេន បន្ទាប់ពីពិធីបុណ្យសព ដែលបានទាក់ទាញអ្នកកាន់ទុក្ខ រាប់លាននាក់នៅទូទាំងប្រទេសអ៊ីរ៉ង់។ អ៊ីរ៉ង់បានបរិហារការធ្វើឃាតនេះថា ជាអំពើភេរវកម្មរបស់រដ្ឋ ហើយបានប្តេជ្ញាសងសឹក ៕
ប្រែសម្រួល ឈូក បូរ៉ា
