បរទេស៖ ប្រធានាធិបតី អ៊ុយក្រែន លោក Volodymyr Zelenskyy បាននិយាយកាលពីថ្ងៃព្រហស្បតិ៍ ថា អាទិភាពទី១ របស់អ៊ុយក្រែន គឺការផ្តល់ប្រព័ន្ធការពារ ដែនអាកាស និងមីស៊ីលបន្ថែមទៀត ពីព្រោះទីតាំងជាច្រើនរបស់អ៊ុយក្រែន ត្រូវបានទទួលរងនូវ ការបាញ់ផ្លោង និងការវាយប្រហារ ដោយមីស៊ីល និងយន្តហោះគ្មានមនុស្សបើករបស់រុស្ស៊ី។
យោងតាមសារព័ត៌មាន VOA ចេញផ្សាយនៅថ្ងៃទី៥ ខែមករា ឆ្នាំ២០២៤ បានឱ្យដឹងថា ថ្លែងនៅក្នុងសុន្ទរកថាប្រចាំថ្ងៃ លោក Zelenskyy ក៏បាននិយាយផងដែរថា កញ្ចប់ជំនួយ “សម្រាប់អ្នកចម្បាំងរបស់យើង” ដែលរួមមានកាំភ្លើងធំ ឧបករណ៍សង្គ្រាមអេឡិចត្រូនិក និងយន្តហោះគ្មានមនុស្សបើកក៏ជាអាទិភាពកំពូលផងដែរ។
លោក Zelenskyy បាននិយាយទៀតថា ប្រទេសរុស្ស៊ីកំពុងព្យាយាមបំបែកស្មារតីរបស់អ៊ុយក្រែនដោយការគំរាមកំហែងដល់ការបំផ្លិចបំផ្លាញនៃវិស័យថាមពលរបស់ខ្លួន ដែលប្រធានាធិបតីបានពិពណ៌នាថាជា “មូលដ្ឋានគ្រឹះនៃជីវិតរបស់យើង” ។
ទន្ទឹមនឹងនេះ ក្រសួងការពារជាតិអង់គ្លេសបានឱ្យដឹងកាលពីថ្ងៃសុក្រនៅក្នុងរបាយការណ៍ចារកម្មប្រចាំថ្ងៃរបស់ខ្លួនស្តីពីអ៊ុយក្រែនថា ការប្រយុទ្ធលើដីកាលពីសប្តាហ៍មុនបានរក្សាខ្សែបន្ទាត់ជួរមុខសម្រាប់អ៊ុយក្រែន ប៉ុន្តែបានរួមបញ្ចូលការបាត់បង់មួយចំនួនផងដែរ។ នៅកណ្តាលទីក្រុងរបស់ Donetsk ក្រសួងបាននិយាយថា ទីក្រុង Avdiivka “នៅតែមានការប្រកួតប្រជែងយ៉ាងខ្លាំង” ប៉ុន្តែកងកម្លាំងរុស្ស៊ីនៅទីក្រុង Marinka ទីបំផុតបានឈានទៅដល់ជាយក្រុងខាងលិចនៃទីក្រុង “បន្ទាប់ពីការប្រយុទ្ធអស់រយៈពេលប្រាំបួនឆ្នាំនៅក្នុងតំបន់” ៕
ប្រែសម្រួលៈ ណៃ តុលា
