បរទេស៖ អ្នកការទូតកំពូល របស់ប្រទេសចិន បាននិយាយកាលពីថ្ងៃសុក្រថា កិច្ចសហប្រតិបត្តិការរវាងប្រទេសចិន និងសហរដ្ឋអាមេរិក មិនមែនជាជម្រើសទៀតទេ ប៉ុន្តែជាការចាំបាច់ ហើយបានអំពាវនាវឱ្យ មានការអភិវឌ្ឍន៍ប្រកបដោយ សុខភាពល្អ នៃទំនាក់ទំនងរវាងចិន និងសហរដ្ឋអាមេរិក។
យោងតាមសារព័ត៌មាន VOA ចេញផ្សាយនៅថ្ងៃទី៥ ខែមករា ឆ្នាំ២០២៤ បានឱ្យដឹងថា ថ្លែងនៅក្នុងព្រឹត្តិការណ៍នៅទីក្រុងប៉េកាំង រំលឹកខួបលើកទី៤៥ នៃទំនាក់ទំនងការទូតរវាងប្រទេសទាំងពីរ រដ្ឋមន្ត្រីការបរទេសចិន លោក Wang Yi បាននិយាយថា ក្រោមកាលៈទេសៈពិភពលោកបច្ចុប្បន្ន សហរដ្ឋអាមេរិក និងចិន មានផលប្រយោជន៍រួមច្រើនជាងពេលណាទាំងអស់ ហើយតម្រូវការសម្រាប់កិច្ចសហប្រតិបត្តិការ គឺត្រូវបានពង្រឹង។
លោក Wang បាននិយាយថា “អាចនិយាយបានថា កិច្ចសហប្រតិបត្តិការចិន-សហរដ្ឋអាមេរិក លែងជាជម្រើសដែលមិនអាចខ្វះបានសម្រាប់ប្រទេសទាំងពីរ ឬសូម្បីតែសម្រាប់ពិភពលោកនោះទេ ប៉ុន្តែជាសំណួរចាំបាច់ដែលត្រូវតែដោះស្រាយយ៉ាងយកចិត្តទុកដាក់”។
លោកក៏បានអំពាវនាវឱ្យភាគីទាំងពីរប្រើប្រាស់ឱ្យបានពេញលេញនូវយន្តការទាំងអស់ដែលត្រូវបានស្តារឡើងវិញរវាងចិនអាមេរិក ដើម្បី “កសាងស្ពានទំនាក់ទំនងរវាងប្រទេសទាំងពីរ” ។ លោកបានអំពាវនាវឱ្យមានកិច្ចសហប្រតិបត្តិការលើវិស័យការទូត សេដ្ឋកិច្ច ហិរញ្ញវត្ថុ ពាណិជ្ជកម្ម និងកសិកម្ម ផងដែរ៕
ប្រែសម្រួលៈ ណៃ តុលា
