បរទេស៖ ប្រធានាធិបតីអ៊ុយក្រែន លោក Volodymyr Zelenskyy បានបង្ហាញទំនុកចិត្តថា រុស្ស៊ីអាចចាញ់សង្គ្រាម ហើយបានព្រមានថា សង្រ្គាមនៅអ៊ុយក្រែន បានបង្ហាញថា អឺរ៉ុបគួរតែអភិវឌ្ឍការផលិត អាវុធរួមគ្នាជាមួយអ៊ុយក្រែន និងសាងសង់ឃ្លាំងអាវុធ គ្រប់គ្រាន់សម្រាប់ការពារខ្លួន។
យោងតាមសារព័ត៌មាន VOA ចេញផ្សាយនៅថ្ងៃទី៧ ខែមករា ឆ្នាំ២០២៤ បានឱ្យដឹងដោយផ្អែកតាមការលើកឡើងរបស់លោក Zelenskyy ថា “រយៈពេលពីរឆ្នាំនៃសង្រ្គាមនេះ បានបង្ហាញថា អឺរ៉ុបត្រូវការឃ្លាំងអាវុធគ្រប់គ្រាន់ សម្រាប់ការពារសេរីភាព។ សមត្ថភាពរបស់ខ្លួនដើម្បីធានាការការពារ។ សក្ដានុពលរបស់ខ្លួន ដែលនឹងអនុញ្ញាតឲ្យអឺរ៉ុបទាំងអស់ ឬផ្នែកណាមួយរបស់ខ្លួនឈរ និងការពារខ្លួននៅក្រោម ស្ថានភាពសកលលោកណាមួយ»។
លោក Zelenskyy បានធ្វើអត្ថាធិប្បាយតាមរយៈ តំណភ្ជាប់វីដេអូនៅឯសន្និសិទការពារជាតិទីក្រុង Stockholm កាលពីថ្ងៃអាទិត្យ ខណៈដែលរដ្ឋមន្ត្រីការបរទេសស៊ុយអែត Tobias Billstrom បានសម្តែងការប្តេជ្ញាចិត្ត របស់ប្រទេសស៊ុយអែត ក្នុងការគាំទ្រទីក្រុងគៀវ ។
ប្រទេសជប៉ុនកាលពីថ្ងៃអាទិត្យ ក៏បានសន្យាថា នឹងគាំទ្រដល់ទីក្រុងគៀវ នៅពេលដែលរដ្ឋមន្ត្រីការបរទេសជប៉ុន Yoko Kamikawa បានធ្វើទស្សនកិច្ចដោយមិនប្រកាសមួយ ដោយក្លាយជាភ្ញៀវបរទេសផ្លូវការដំបូងគេ នៅក្នុងរដ្ឋធានីអ៊ុយក្រែនក្នុងឆ្នាំ២០២៤ នេះ ៕
ប្រែសម្រួលៈ ណៃ តុលា
