តូក្យូ៖ អ្នកការទូតកំពូលរបស់ប្រទេសជប៉ុន និងសហរដ្ឋអាមេរិក បានព្រមព្រៀងគ្នាឲ្យដឹងថា ប្រទេសទាំងពីរនឹងសហការយ៉ាងជិតស្និទ្ធ ក្នុងការដោះស្រាយបញ្ហាទាក់ទង នឹងប្រទេសចិន និងលើសារៈសំខាន់នៃសន្តិភាព និងស្ថិរភាពជុំវិញកោះតៃវ៉ាន់។
បន្ទាប់ពីកិច្ចប្រជុំនៅទីក្រុងវ៉ាស៊ីនតោន រដ្ឋមន្ត្រីការបរទេសជប៉ុនលោកស្រី Yoko Kamikawa ក៏បានប្រាប់អ្នកសារព័ត៌មានថា លោកស្រីបានយល់ព្រមជាមួយ រដ្ឋមន្ត្រីការបរទេសអាមេរិក លោក Antony Blinken ដើម្បីធ្វើការឆ្ពោះទៅរក “ជោគជ័យ” នៃដំណើរទស្សនកិច្ចផ្លូវរដ្ឋនៅចុងឆ្នាំនេះ ទៅកាន់រដ្ឋធានីរបស់សហរដ្ឋអាមេរិក ដោយនាយករដ្ឋមន្ត្រីជប៉ុនលោក ហ្វូមីអូ គីស៊ីដា ។
ទោះជាយ៉ាងណាក៏ដោយលោកស្រី Kamikawa បានឈប់បង្ហាញពីពេលវេលា ដែលដំណើរទស្សនកិច្ចនេះ ដែលលោកស្រីបានឲ្យដឹងថា មានគោលបំណងពង្រឹងភាពជាដៃគូរបស់ជប៉ុន ជាមួយសហរដ្ឋអាមេរិកនៅគ្រប់វិស័យ អាចនឹងកើតឡើង ដោយចង្អុលប្រាប់ពីកាលវិភាគ នៅតែត្រូវបានបញ្ជាក់។
ប្រភពស្និទ្ធនឹងទំនាក់ទំនងទ្វេភាគីបានឲ្យដឹងថា នៅចុងខែធ្នូដំណើរទស្សនកិច្ច អាចធ្វើឡើងនៅដើមខែមីនា នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូ។
កិច្ចប្រជុំរបស់លោកស្រី Kamikawa ជាមួយលោក Blinken ត្រូវបានធ្វើឡើងមួយថ្ងៃមុន ការបោះឆ្នោតប្រធានាធិបតីតៃវ៉ាន់ ដែលអាចមានផលប៉ះពាល់ យ៉ាងធ្ងន់ធ្ងរដល់ទំនាក់ទំនង របស់កោះដែលគ្រប់គ្រងដោយខ្លួនឯង ជាមួយប្រទេសចិន បណ្តាប្រទេសអាស៊ីផ្សេងទៀត និងសហរដ្ឋអាមេរិក។
ខណៈពេលដែលការបញ្ជាក់ ពីជំហានបន្ថែមទៀតនឹងត្រូវ ធ្វើឡើងដើម្បីបង្កើនការរារាំង និងសមត្ថភាពឆ្លើយតបរបស់សម្ព័ន្ធភាព លោកស្រី Kamikawa បានឲ្យដឹងថាភាគីទាំងពីរ “បានគូសបញ្ជាក់អំពីសារៈសំខាន់នៃសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ហើយបានជំរុញឱ្យមានការដោះស្រាយ ដោយសន្តិវិធីនៃបញ្ហាឆ្លងច្រកសមុទ្រ” ៕
ប្រែសម្រួល ឈូក បូរ៉ា
